Artikolu 11 Tariffi bl-ingrossa għas-servizzi tar-roaming regolati tad-data

1.   It-tariffa bl-ingrossa medja li l-operatur ta’ network miżjur jista’ jimponi fuq il-fornitur tar-roaming għall-forniment ta’ servizzi tar-roaming regolati tad-data permezz tan-network miżjur ma għandhiex tkun aktar minn limitu ta’ salvagwardja ta’ EUR 2,00 għal kull gigabyte ta’ data trażmessa. Dik it-tariffa massima bl-ingrossa għandha tonqos għal EUR 1,80 għal kull gigabyte ta’ data trażmessa fl-1 ta’ Jannar 2023, għal EUR 1,55 għal kull gigabyte fl-1 ta’ Jannar 2024, għal EUR 1,30 għal kull gigabyte fl-1 ta’ Jannar 2025, għal EUR 1,10 għal kull gigabyte fl-1 ta’ Jannar 2026 u għal EUR 1,00 għal kull gigabyte sal-1 ta’ Jannar 2027, u wara dan, mingħajr preġudizzju għall-Artikolu 21, għandha tibqa’ EUR 1,00 għal kull gigabyte ta’ data trażmessa sat-30 ta’ Ġunju 2032.

2.   It-tariffa bl-ingrossa medja msemmija fil-paragrafu 1 għandha tapplika bejn kwalunkwe żewġ operaturi u għandha tiġi kkalkulata fuq perjodu ta’ 12-il xahar jew kwalunkwe perjodu iqsar li jkun fadal qabel tmiem il-perjodu tal-applikazzjoni ta’ tariffa bl-ingrossa medja massima, kif previst fil-paragrafu 1 jew qabel it-30 ta’ Ġunju 2032.

3.   It-tariffa bl-ingrossa medja msemmija fil-paragrafu 1 għandha tiġi kkalkulata billi d-dħul totali bl-ingrossa riċevut mill-operatur tan-network miżjur jew mill-operatur tan-network tal-pajjiż tal-oriġini għall-forniment ta’ servizzi tar-roaming regolati tad-data tul il-perjodu rilevanti jiġi diviż bl-għadd totali ta’ megabytes tad-data effettivament użati għall-forniment ta’ dawk is-servizzi tul dak il-perjodu, aggregat abbażi ta’ kull kilobyte f’isem il-fornitur tar-roaming rilevanti jew l-operatur tan-network tal-pajjiż tal-oriġini tul dak il-perjodu.