Airteagal 15 Trédhearcacht maidir leis na modhanna rochtana ar sheirbhísí éigeandála

Cuirfidh an soláthraí seirbhísí fánaíochta in iúl don chustaiméir seirbhísí fánaíochta, trí bhíthin teachtaireacht uathoibríoch, go bhféadfaidh an custaiméir rochtain a fháil saor in aisce ar sheirbhísí éigeandála trí ghlaoch ar an uimhir aonair éigeandála Eorpach “112”. Leis an teachtaireacht sin, soláthrófar freisin don chustaiméir seirbhísí fánaíochta nasc chuig leathanach gréasáin tiomnaithe, saor in aisce, a bheidh inrochtana do dhaoine faoi mhíchumas, lena soláthraítear faisnéis faoi mhodhanna malartacha rochtana ar sheirbhísí éigeandála trí chumarsáid éigeandála atá sainordaithe sa Bhallstát a bhfuil cuairt á tabhairt air. Déanfar an fhaisnéis a sheachadadh ar ghléas soghluaiste an chustaiméara trí theachtaireacht SMS, nó i gcás inar gá trí mhodh iomchuí arna oiriúnú chun gur fusa an fhaisnéis a fháil agus a thuiscint, gach uair a théann custaiméir seirbhísí fánaíochta isteach i mBallstát seachas Ballstát sholáthraí baile an chustaiméara seirbhísí fánaíochta. Cuirfear an fhaisnéis ar fáil saor in aisce.

I mBallstáit ina n-imscartar feidhmchláir shoghluaiste um rabhadh poiblí, i gcás ina ndéanann an Ballstát a bhfuil cuairt á tabhairt air nasc chuig an bhfeidhmchlár sin a thuairisciú sa bhunachar sonraí arna bhunú de bhun Airteagal 16, an chéad mhír, pointe (b), áireoidh soláthraithe seirbhísí fánaíochta, sa teachtaireacht dá dtagraítear sa dara mír den Airteagal seo, an fhaisnéis lena léirítear go bhféadfar rabhaidh phoiblí a fháil le feidhmchlár soghluaiste um rabhadh poiblí. Cuirfear nasc chuig an bhfeidhmchlár soghluaiste um rabhadh poiblí agus treoracha maidir lena íoslódáil ar fáil ar an leathanach gréasáin tiomnaithe dá dtagraítear sa dara mír den Airteagal seo.