Artikolu 15 Trasparenza fir-rigward tal-mezzi ta’ aċċess għas-servizzi ta’ emerġenza

Il-fornitur tar-roaming għandu jinforma lill-klijenti tar-roaming, permezz ta’ messaġġ awtomatiku, li dawn tal-aħħar jistgħu jaċċessaw is-servizzi ta’ emerġenza mingħajr ħlas billi jċemplu n-numru uniku Ewropew ta’ emerġenza “112”. Dak il-messaġġ għandu jipprovdi wkoll lill-klijenti tar-roaming b’link għall-aċċess, mingħajr ħlas, ta’ paġna web speċifika dwar dan, li tkun aċċessibbli għall-persuni b’diżabbiltà u li tipprovdi informazzjoni dwar mezzi alternattivi ta’ aċċess għas-servizzi ta’ emerġenza permezz ta’ komunikazzjonijiet ta’ emerġenza obbligatorji fl-Istat Membru miżjur. L-informazzjoni għandha tintbagħat lill-apparat mobbli tal-klijenti tar-roaming b’messaġġ SMS, jew fejn neċessarju permezz ta’ mezz xieraq adattat biex jiffaċilita l-wasla u l-fehim tagħha kull darba li l-klijenti tar-roaming jidħlu fi Stat Membru differenti minn dak tal-fornitur domestiku tiegħu. L-informazzjoni għandha tingħata mingħajr ħlas;

Fl-Istati Membri fejn jiġu varati applikazzjonijiet mobbli ta’ twissija pubblika, jekk link għal dik l-applikazzjoni tiġi rrapportata mill-Istat Membru miżjur fil-bażi tad-data stabbilita fis-sens tal-Artikolu 16, l-ewwel paragrafu, punt (b), il-fornituri tar-roaming għandhom jinkludu, fil-messaġġ imsemmi fit-tieni paragrafu ta’ dan l-Artikolu, l-informazzjoni li tindika li t-twissijiet pubbliċi jistgħu jaslu permezz ta’ applikazzjoni mobbli ta’ twissija pubblika. Link għall-applikazzjoni mobbli ta’ twissija pubblika u l-istruzzjonijiet għat-tniżżil tagħha għandhom jiġu pprovduti fil-paġna web speċifika, imsemmija fit-tieni paragrafu ta’ dan l-Artikolu.