Airteagal 21 Athbhreithniú

1.   Cuirfidh an Coimisiún, tar éis dó dul i gcomhairle le BEREC, dhá thuarascáil faoi bhráid Pharlaimint na hEorpa agus na Comhairle, mar aon le togra reachtach ina dhiaidh sin, más iomchuí, chun an Rialachán seo a leasú.

Déanfar an chéad tuarascáil sin a thíolacadh faoin 30 Meitheamh 2025 agus an dara ceann faoin 30 Meitheamh 2029.

Áireofar leis na tuarascálacha, inter alia, measúnú ar an méid seo a leanas:

2.   Chun measúnú a dhéanamh ar fhorbairtí iomaíocha i margaí fánaíochta uile-Aontais, baileoidh BEREC sonraí ó údaráis rialála náisiúnta go tráthrialta faoi na forbairtí atá ann maidir le muirir mhiondíola agus mhórdhíola ar sheirbhísí fánaíochta guthghlaonna, SMS agus sonraí rialáilte, lena n-áirítear muirir mhórdhíola a chuirtear i bhfeidhm ar thrácht fánaíochta chothromaithe agus neamhchothromaithe faoi seach, ar thionchar fheidhmiú céimneach agus chur chun feidhme na chéad ghlúine eile de líonraí cumarsáide soghluaiste agus teicneolaíochtaí ar an margadh fánaíochta, ar úsáid ardán trádála agus ionstraimí comhchosúla, ar fhorbairt na fánaíochta meaisín le meaisín agus gléasanna IoT, agus ar a mhéid a chumhdaíonn comhaontuithe fánaíochta mórdhíola cáilíocht na seirbhíse agus a mhéid a thugann siad rochtain ar theicneolaíochtaí agus glúnta éagsúla líonra. I gcás inarb infheidhme, féadfaidh na húdaráis rialála náisiúnta sonraí den sórt sin a sholáthar i gcomhar le húdaráis inniúla eile.

Baileoidh BEREC sonraí go rialta freisin ó údaráis rialála náisiúnta maidir le cur i bhfeidhm beartas maidir le húsáid chóir ag oibreoirí, forbairtí taraifí intíre amháin, cur i bhfeidhm na sásraí inbhuanaitheachta agus gearán faoin bhfánaíocht agus comhlíonadh na n-oibleagáidí cáilíochta seirbhíse. I gcás inarb iomchuí, comhordóidh na húdaráis rialála náisiúnta le húdaráis inniúla eile agus baileoidh siad sonraí den sórt sin ó údaráis den sórt sin. Déanfaidh BEREC faisnéis bhreise a bhailiú agus a sholáthar go rialta maidir le trédhearcacht, cur i bhfeidhm beart maidir le cumarsáid éigeandála, seirbhísí breisluacha agus fánaíocht ar líonraí neamh-thrastíre poiblí cumarsáide soghluaiste.

Baileoidh BEREC sonraí freisin maidir le comhaontuithe fánaíochta mórdhíola nach bhfuil faoi réir na muirear fánaíochta mórdhíola dá bhforáiltear in Airteagal 9, 10 nó 11 agus maidir le cur chun feidhme na mbeart conarthach ar an leibhéal mórdhíola atá dírithe ar chosc a chur ar bhuanfhánaíocht nó ar leas a bhaint as an rochtain ar fhánaíocht mhórdhíola, ar úsáid aimhrialta nó mí-úsáid í, chun críoch seachas chun seirbhísí fánaíochta rialáilte a sholáthar do chustaiméirí na soláthraithe seirbhísí fánaíochta fad atá na custaiméirí sin ag taisteal laistigh den Aontas ar bhonn tréimhsiúil.

Tabharfar fógra don Choimisiún faoi na sonraí arna mbailiú ag BEREC de bhun na míre seo uair sa bhliain ar a laghad. Déanfaidh an Coimisiún iad a chur ar fáil go poiblí.

Faoin 30 Meitheamh 2027, cuirfidh an Coimisiún tuarascáil eatramhach faoi bhráid Pharlaimint na hEorpa agus na Comhairle, bunaithe ar na sonraí arna mbailiú ag BEREC de bhun na míre seo, agus ina dhiaidh sin, más iomchuí, togra reachtach chun an Rialachán seo a leasú.

Ar bhonn na sonraí arna mbailiú de bhun na míre seo, déanfaidh BEREC tuairisciú go rialta maidir le héabhlóid na bpatrún praghsála agus tomhaltais sna Ballstáit i gcás seirbhísí baile agus fánaíochta araon, éabhlóid na rátaí fánaíochta mórdhíola iarbhír i gcás trácht neamhchothromaithe idir soláthraithe seirbhísí fánaíochta, agus maidir leis an ngaol idir praghsanna miondíola, muirir mhórdhíola agus costais mhórdhíola ar sheirbhísí fánaíochta. Déanfaidh BEREC measúnú ar cé chomh dlúth a bhaineann na gnéithe sin lena chéile.