Airteagal 3 Glacadh nó modhnú struchtúir MVS roimh ligean isteach chun a dtrádála

1.   Áiritheoidh na Ballstáit go mbeidh sé de cheart ag cuideachta nach bhfuil a scaireanna ligthe isteach chun a dtrádála cheana féin ar mhargadh rialáilte nó ar MTF struchtúr MVS a ghlacadh chun a scaireanna a ligean isteach chun a dtrádála ar MTF. Áiritheoidh na Ballstáit go ndéanfar cinneadh na cuideachta struchtúr MVS a ghlacadh ag cruinniú ginearálta na scairshealbhóirí (‘cruinniú ginearálta’) trí thromlach cáilithe ar a laghad mar a shonraítear sa dlí náisiúnta. A mhéid a bhaineann le struchtúr MVS a ghlacadh, ní bheidh sé mar choinníoll ag na Ballstáit go bhforálfar do chearta eacnamaíocha feabhsaithe le haghaidh scaireanna gan cearta vótála feabhsaithe.

Chun críocha na chéad fhomhíre, i gcás ina bhfuil roinnt aicmí scaireanna ann, beidh an cinneadh maidir le struchtúr MVS a ghlacadh faoi réir vóta ar leithligh i ngach aicme scaireanna a ndéantar difear dá gcearta freisin.

2.   Cuimseofar leis an gceart chun struchtúr MVS a ghlacadh dá dtagraítear i mír 1 ceart cuideachta struchtúr MVS a ghlacadh sula n-iarrtar go ligfí isteach a scaireanna chun a dtrádála ar MTF.

3.   Féadfaidh na Ballstáit feidhmiú na gceart vótála feabhsaithe a ghabhann le MVS a chur mar choinníoll le scaireanna na cuideachta a bheith ligthe isteach chun a dtrádála ar MTF.

4.   Áiritheoidh na Ballstáit nach gcuirfidh na gnólachtaí infheistíochta agus na hoibreoirí margaidh a bhfuil MTF á oibriú acu cosc ar scaireanna cuideachta a ligean isteach chun a dtrádála ar na forais go bhfuil struchtúr MVS glactha ag an gcuideachta i gcomhréir le mír 1.

5.   Beidh feidhm ag an Airteagal seo freisin, mutatis mutandis, maidir le cuideachta nach bhfuil a scaireanna ligthe isteach cheana chun a dtrádála ar mhargadh rialáilte nó MTF, i gcás ina gcinneann an chuideachta sin struchtúr MVS atá ann cheana a mhodhnú d’fhonn a iarraidh go ligfí isteach a scaireanna chun a dtrádála ar MTF.