IARSCRÍBHINN II An nós imeachta maidir le ceanglais feidhmíochta a shainmhíniú

IARSCRÍBHINN II

An nós imeachta maidir le ceanglais feidhmíochta a shainmhíniú

Socrófar ceanglais feidhmíochta táirgeshonracha nó chothrománacha mar a leanas:

trí anailís theicniúil, chomhshaoil agus eacnamaíoch roghnófar líon múnlaí ionadaíocha den táirge nó de na táirgí i gceist atá ar an margadh agus sainaithneofar na roghanna teicniúla atá ann chun feabhas a chur ar fheidhmíocht an táirge i ndáil leis na paraiméadair tháirge dá dtagraítear in Iarscríbhinn I, agus inmharthanacht eacnamaíoch na roghanna á cur i gcuntas agus aon mhéadú suntasach ar thionchair eile ar an gcomhshaol ar feadh na saolré agus caillteanas suntasach feidhmíochta nó úsáideachta do thomhaltóirí á seachaint.

San anailís dá dtagraítear sa chéad mhír, sainaithneofar freisin, i gcás an pharaiméadair atá faoi bhreithniú, na táirgí agus na teicneolaíochtaí is fearr feidhmíocht atá ar fáil ar an margadh, chomh maith leis na feabhsúcháin atá ag teacht ar an teicneolaíocht.

Cuirfear feidhmíocht na dtáirgí atá ar fáil ar na margaí idirnáisiúnta agus na tagarmharcanna a leagtar síos i ndlí tíortha eile san áireamh le linn na hanailíse dá dtagraítear sa chéad mhír agus freisin nuair a bhíonn ceanglais á leagan síos.

Bunaithe ar an anailís dá dtagraítear sa chéad mhír, agus an fhéidearthacht eacnamaíoch agus theicniúil á cur san áireamh, lena n-áirítear infhaighteacht príomhacmhainní agus príomhtheicneolaíochtaí, mar aon leis an acmhainneacht chun feabhais, déanfar leibhéil nó ceanglais neamhchainníochtúla a shainmhíniú.

Aon teorainn tiúchana le haghaidh substaintí amhail dá dtagraítear in Iarscríbhinn I, pointe (f), bunófar í ar anailís chríochnúil ar inbhuanaitheacht na substaintí agus a roghanna malartacha sainaitheanta, agus ní bheidh éifeachtaí díobhálacha suntasacha aici ar shláinte an duine ná ar an gcomhshaol. Aon cheanglas feidhmíochta a bhaineann le substaintí amhail dá dtagraítear in Iarscríbhinn I, pointe (f), cuirfear san áireamh leis measúnuithe ar shábháilteacht cheimiceach atá ann cheana a dhéanann comhlachtaí ábhartha an Aontais le haghaidh na substaintí lena mbaineann, mar aon le critéir atá sábháilte agus inbhuanaithe trí dhearadh maidir le ceimiceáin agus ábhair arna bhforbairt ag an gCoimisiún. Déanfar gnéithe d’in-fhorfheidhmitheacht a mheas le teorainneacha tiúchana atá beartaithe freisin, amhail teorainneacha braite anailíseacha.

I gcás inarb ábhartha, cuirfear san áireamh san anailís dá dtagraítear sa chéad mhír na tionchair is dócha a bheadh ag an athrú aeráide ar an táirge le linn a shaolré ionchasaí, agus acmhainneacht an táirge feabhas a chur ar an athléimneacht aeráide i rith a shaolré.

Déanfar anailís íogaireachta lena gcumhdaítear na tosca ábhartha, amhail costas an fhuinnimh nó na n-acmhainní eile, costas na n-amhábhar agus na dteicneolaíochtaí is gá, costais táirgeachta, rátaí lascaine, agus, i gcás inarb iomchuí, costais sheachtracha chomhshaoil, lena n-áirítear astaíochtaí gás ceaptha teasa seachanta.

Chun an anailís dá dtagraítear sa chéad fhomhír a fhorbairt, déanfar faisnéis ábhartha atá ar fáil i gcreat ghníomhaíochtaí eile an Aontais, lena n-áirítear, inter alia, treochláir earnála atá ann cheana amhail dá dtagraítear i Rialachán (AE) 2021/1119, a chur i gcuntas agus áireofar inti faisnéis theicniúil a úsáidtear mar bhunús do Rialachán (CE) Uimh. 66/2010, Treoir 2010/75/AE agus critéir maidir le soláthar poiblí glas, nó faisnéis theicniúil a eascraíonn as Rialachán (CE) Uimh. 66/2010, Treoir 2010/75/AE, critéir scagtha theicniúla arna nglacadh de bhun Rialachán (AE) 2020/852 agus critéir AE um sholáthar poiblí glas.

Beidh feidhm ag an méid sin freisin maidir le faisnéis atá ar fáil ó chláir atá ann cheana arna gcur i bhfeidhm i gcodanna eile den domhan chun ceanglais éicidhearthóireachta sonracha do tháirgí a thrádáiltear le comhpháirtithe eacnamaíocha an Aontais a leagan síos.