1. Agus é ag ullmhú na gcód gréasáin, an dréachtphlean forbartha gréasáin uile-Aontais le haghaidh gás nádúrtha agus an chláir oibre bhliantúil dá dtagraítear in Airteagal 26(1), (2) agus (3), seolfaidh ENTSO don Ghás próiseas comhairliúcháin phoiblí forleathan, ag céim luath agus ar bhealach trédhearcach agus oscailte, ina n-áireofar na rannpháirtithe ábhartha go léir sa mhargadh, agus, go háirithe, na heagraíochtaí a dhéanann ionadaíocht ar na geallsealbhóirí uile, i gcomhréir lena rialacha nós imeachta dá dtagraítear in Airteagal 25(1). Áireofar sa chomhairliúchán sin na húdaráis rialála agus údaráis náisiúnta eile, gnóthais soláthair agus táirgthe, úsáideoirí gréasáin, lena n-áirítear custaiméirí, oibreoirí córais dáileacháin, lena n-áirítear comhlachais tionsclaíocha ábhartha agus comhlachtaí teicniúla agus grúpaí de gheallsealbhóirí. Foilseoidh ENTSO don Ghás dréachtaí de na cóid ghréasáin, den phlean forbartha gréasáin uile-Aontais le haghaidh gás nádúrtha agus den chlár oibre bliantúil le haghaidh barúlacha ó na geallsealbhóirí agus tabharfaidh sé dóthain ama dóibh páirt a ghlacadh sa phróiseas comhairliúcháin go héifeachtach. Is é is aidhm don chomhairliúchán sin tuairimí agus tograí na ngeallsealbhóirí ábhartha uile a shainaithint i rith an phróisis cinnteoireachta.