8. Faoin 31 Nollaig 2026, glacfaidh an Coimisiún gníomhartha cur chun feidhme lena mbunófar an mhodheolaíocht chun an céatadán d’ábhar athchúrsáilte a ríomh agus a dheimhniú a aisghabhtar ó dhramhaíl phlaisteach iarthomhaltais a athchúrsáladh agus a bailíodh laistigh den Aontas i gcomhréir leis na coinníollacha a leagtar amach i mír 3 den Airteagal seo, chomh maith le formáid na doiciméadachta teicniúla dá dtagraítear in Iarscríbhinn VII. Chun na críche sin, cuirfidh an Coimisiún san áireamh an úsáid a bhaintear as na hamhábhair thánaisteacha a eascraíonn as sin atá de cháilíocht leordhóthanach i gcomparáid leis an mbunábhar is féidir a úsáid chun amhábhair phríomha a ionadú. Féadfar a áireamh sa mhodheolaíocht fíorúcháin an oibleagáid iniúchadh neamhspleách tríú páirtí a dhéanamh ar mhonaróirí ábhair athchúrsáilte san Aontas agus pacáistíocht phlaisteach a chuirtear ar an margadh mar aonad díolacháin ar leithligh ó tháirgí eile chun a áirithiú go gcomhlíonfar na coinníollacha a leagtar amach i mír 3 den Airteagal seo agus sa ghníomh tarmligthe a ghlactar faoi mhír 9 den Airteagal seo.
Agus na gníomhartha cur chun feidhme á nglacadh aige, déanfaidh an Coimisiún measúnú ar na teicneolaíochtaí athchúrsála atá ar fáil, agus a bhfeidhmíocht eacnamaíoch agus chomhshaoil á cur san áireamh, lena n-áirítear cáilíocht an aschuir, infhaighteacht na dramhaíola, an fuinneamh is gá agus astaíochtaí gás ceaptha teasa agus tionchair ábhartha eile ar an gcomhshaol.
Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 65(2).