8. Sal-31 ta' Diċembru 2026, il-Kummissjoni għandha tadotta atti ta' implimentazzjoni li jistabbilixxu l-metodoloġija għall-kalkolu u l-verifika tal-perċentwal tal-kontenut riċiklat irkuprat mill-iskart tal-plastik ta' wara l-użu mill-konsumatur riċiklat u miġbur fl-Unjoni f’konformità mal-kundizzjonijiet stipulati fil-paragrafu 3 ta' dan l-Artikolu, kif ukoll il-format għad-dokumentazzjoni teknika msemmija fl-Anness VII. Għal dak l-għan, il-Kummissjoni għandha tqis l-użu tal-materja prima sekondarja li tirriżulta li tkun ta' kwalità suffiċjenti meta mqabbla mal-materja oriġinali li tista' tintuża biex tissostitwixxi l-materja prima primarja. Il-metodoloġija ta' verifika tista' tinkludi l-obbligu li jitwettqu awditi indipendenti minn parti terza fuq il-manifatturi tal-kontenut riċiklat fl-Unjoni u tal-imballaġġ tal-plastik imqiegħed fis-suq bħala unità tal-bejgħ separata minn prodotti oħra, biex jiġi żgurat li jiġu ssodisfati l-kundizzjonijiet stabbiliti fil-paragrafu 3 ta' dan l-Artikolu u fl-att delegat adottat skont il-paragrafu 9 ta' dan l-Artikolu.
Meta tadotta l-atti ta' implimentazzjoni, il-Kummissjoni għandha tivvaluta t-teknoloġiji ta' riċiklaġġ disponibbli, filwaqt li tqis il-prestazzjoni ekonomika u ambjentali tagħhom, inkluż il-kwalità tal-output, id-disponibbiltà tal-iskart, l-enerġija meħtieġa u l-emissjonijiet ta' gassijiet serra u impatti ambjentali rilevanti oħra.
Dawk l-atti ta' implimentazzjoni għandhom jiġu adottati f'konformità mal-proċedura ta' eżami msemmija fl-Artikolu 65(2).