Airteagal 25 Srianta le formáidí pacáistíochta áirithe a úsáid

1.   Ón 1 Eanáir 2030, ní chuirfidh oibreoirí eacnamaíocha pacáistíocht ar an margadh sna formáidí agus le haghaidh na n-úsáidí a liostaítear in Iarscríbhinn V.

2.   De mhaolú ar Airteagal 4(2), féadfaidh na Ballstáit srianta a choinneáil ar bun arna nglacadh roimh an 1 Eanáir 2025 maidir le pacáistíocht a chur ar an margadh sna formáidí agus le haghaidh na n-úsáidí a liostaítear in Iarscríbhinn V ach atá déanta as ábhair nach liostaítear in Iarscríbhinn V.

3.   Beidh mír 1 den Airteagal seo gan dochar d’Airteagal 9(2) pointe (b).

4.   De mhaolú ar mhír 1 den Airteagal seo, féadfaidh na Ballstáit cead a thabhairt do na micrifhiontair mar a shainmhínítear iad i Moladh 2003/361/CE, de réir mar is infheidhme an 11 Feabhra 2025, pacáistíocht a chur ar an margadh sna formáidí agus don úsáid a liostaítear i bpointe 3 d’Iarscríbhinn V a ghabhann leis an Rialachán seo i gcás ina bhfuil sé léirithe nach bhfuil sé indéanta go teicniúil gan pacáistíocht den sórt sin a úsáid nó rochtain a fháil ar an mbonneagar atá riachtanach d’fheidhmiú córais athúsáide.

5.   Faoin 12 Feabhra 2032, déanfaidh an Coimisiún measúnú ar thionchar dearfach na srianta agus maoluithe agus díolúintí ó na srianta sin a ghabhann leo ar an gcomhshaol, agus cuirfidh sé san áireamh infhaighteacht réiteach malartach pacáistíochta lena gcomhlíontar na ceanglais sábháilteachta agus sláinteachais is infheidhme maidir le pacáistíocht atá íogair ó thaobh teagmhála de. Ar bhonn an mheasúnaithe sin, déanfaidh an Coimisiún, agus é mar chuspóir aige dramhaíl ó phacáistíocht a laghdú, athbhreithniú ar an Airteagal seo agus ar Iarscríbhinn V chun iad a oiriúnú don dul chun cinn teicniúil agus eolaíoch. Ar bhonn an athbhreithnithe sin, déanfaidh an Coimisiún measúnú ar a iomchuí atá sé srianta nua a bhunú maidir le formáidí sonracha pacáistíochta a úsáid agus ar a ábhartha atá sé na maoluithe agus díolúintí a leagtar amach san Airteagal seo a choinneáil ar bun, agus, i gcás inarb iomchuí, tíolacfaidh sé togra reachtach.

6.   Faoin 12 Feabhra 2027, foilseoidh an Coimisiún treoirlínte, i gcomhairle leis na Ballstáit agus leis an Údarás Eorpach um Shábháilteacht Bia, ina míneofar Iarscríbhinn V ar bhealach níos mionsonraithe, agus lena n-aireofar samplaí de na formáidí pacáistíochta a thagann faoin raon feidhme, agus aon díolúintí ó na srianta, agus soláthróidh sé liosta neamh-uileghabhálach de thorthaí agus glasraí a eisiatar ó phointe 2 d’Iarscríbhinn V.