2. Nuair a ghlactar bearta lena leagtar síos na rialacha riaracháin agus nós imeachta dá dtagraítear in Airteagal 40(2), bunóidh na Ballstáit ceanglais agus mionsonraí an nós imeachta um údarú. D’fhéadfadh na ceanglais agus mionsonraí sin a bheith éagsúil maidir le hoibleagáidí faoin bhfreagracht leathnaithe táirgeora a chomhlíonadh ar bhonn aonair nó ar bhonn comhchoiteann. Bunóidh na Ballstáit freisin na módúlachtaí chun comhlíonadh a fhíorú, lena n-áirítear an fhaisnéis atá le soláthar ag táirgeoirí nó ag eagraíochtaí um fhreagracht táirgeora chun na críche sin. Áireofar leis an nós imeachta údarúcháin ceanglais maidir le fíorú na socruithe a chuirfear i bhfeidhm chun comhlíonadh na gceanglas a leagtar síos i mír 3 den Airteagal seo a áirithiú, mar aon le frámaí ama don fhíorú sin, ar tréimhsí iad nach mbeidh níos faide ná 18 seachtaine ón dáta a chuirfear isteach sainchomhad iarratais iomlán. Féadfaidh údarás inniúil nó saineolaí neamhspleách an fíorú sin a dhéanamh agus eiseoidh siad tuarascáil fíorúcháin ar thoradh an fhíoraithe. Beidh an saineolaí neamhspleách sin neamhspleách ón údarás inniúil agus ón eagraíocht um fhreagracht táirgeoirí nó na táirgeoirí údaraithe ar bhonn aonair.