Airteagal 77 Tuairisc ar thacar sonraí agus catalóg tacar sonraí

1.   Déanfaidh comhlachtaí rochtana sonraí sláinte, trí chatalóg tacar sonraí meaisín-inléite caighdeánaithe agus atá ar fáil go poiblí, tuairisc a sholáthar, i bhfoirm meiteashonraí, ar na tacair sonraí atá ar fáil agus faoina saintréithe. Áireofar sa tuairisc ar gach tacar sonraí faisnéis maidir leis an bhfoinse, an raon feidhme, na príomh-shaintréithe, cineál na sonraí leictreonacha sláinte sa tacar sonraí agus na coinníollacha a bhaineann leis na sonraí sin a chur ar fáil.

2.   Beidh na tuairiscí ar thacair sonraí i gcatalóg náisiúnta tacar sonraí ar fáil, i dteanga oifigiúil amháin, ar a laghad, de chuid an Aontais. Beidh an chatalóg tacar sonraí le haghaidh institiúidí, chomhlachtaí, oifigí, agus ghníomhaireachtaí an Aontais arna soláthar ag seirbhís rochtana sonraí sláinte an Aontais ar fáil i ngach teanga oifigiúil de chuid an Aontais.

3.   Cuirfear an chatalóg tacar sonraí ar fáil do phointí faisnéise aonair arna mbunú nó arna n-ainmniú faoi Airteagal 8 de Rialachán (AE) 2022/868.

4.   Faoin 26 Márta 2027, leagfaidh an Coimisiún amach, trí bhíthin gníomhartha cur chun feidhme, na heilimintí íosta nach mór do shealbhóirí sonraí sláinte a sholáthar le haghaidh tacair sonraí agus saintréithe na n-eilimintí sin. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 98(2).