Artikolu 77 Deskrizzjoni tas-settijiet tad-data u katalgu tas-settijiet tad-data

1.   Il-korpi tal-aċċess għad-data dwar is-saħħa għandhom, permezz ta’ katalgu ta’ settijiet tad-data li jinqara mill-magni disponibbli għall-pubbliku u standardizzat, jipprovdi deskrizzjoni, fil-forma ta’ metadata tas-settijiet tad-data disponibbli u l-karatteristiċi tagħhom. Id-deskrizzjoni ta’ kull sett tad-data għandha tinkludi informazzjoni dwar is-sors, il-kamp ta’ applikazzjoni, il-karatteristiċi ewlenin, u n-natura tad-data elettronika dwar is-saħħa fis-sett tad-data u l-kundizzjonijiet biex dik id-data ssir disponibbli.

2.   Id-deskrizzjonijiet tas-settijiet tad-data fil-katalgu tas-settijiet tad-data nazzjonali għandhom ikunu disponibbli, b’mill-inqas lingwa uffiċjali waħda tal-Unjoni. Il-katalgu tas-settijiet tad-data għall-istituzzjonijiet, korpi, uffiċċji u aġenziji previsti mis-servizz tal-aċċess għad-data dwar is-saħħa tal-Unjoni għandu jkun disponibbli bil-lingwi uffiċjali kollha tal-Unjoni.

3.   Il-katalgu nazzjonali tas-settijiet tad-data għandu jkun disponibbli għal punti uniċi ta’ informazzjoni stabbiliti jew ddeżinjati skont l-Artikolu 8 tar-Regolament (UE) 2022/868.

4.   Sas-26 ta’ Marzu 2027, il-Kummissjoni għandha, permezz ta’ atti ta’ implimentazzjoni, tistabbilixxi l-elementi minimi li d-detenturi tad-data dwar is-saħħa għandhom jipprovdu għas-settijiet tad-data u l-karatteristiċi ta’ dawk l-elementi. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 98(2).