Airteagal 93 Fóram geallsealbhóirí

1.   Bunaítear leis seo fóram geallsealbhóirí chun malartú faisnéise a éascú agus chun comhar i measc geallsealbhóirí a chur chun cinn maidir le cur chun feidhme an Rialacháin seo.

2.   Beidh comhdhéanamh cothrom ag fóram na ngeallsealbhóirí agus beidh sé comhdhéanta de gheallsealbhóirí ábhartha, lena n-áirítear ionadaithe eagraíochtaí othar, gairmithe sláinte, an lucht tionscail, eagraíochtaí tomhaltóirí, taighdeoirí eolaíochta agus an lucht léinn agus déanfaidh sé ionadaíocht ar a dtuairimí. I gcás ina ndéantar ionadaíocht ar leasanna tráchtála i bhfóram na ngeallsealbhóirí, beidh an ionadaíocht ar leasanna den sórt sin bunaithe ar mheascán cothrom idir cuideachtaí móra, fiontair bheaga agus mheánmhéide agus gnólachtaí nuathionscanta. Cuimseofar úsáid phríomhúil agus úsáid thánaisteach go cothrom i gcúraimí fhóram na ngeallsealbhóirí.

3.   Is é an Coimisiún a cheapfaidh comhaltaí fhóram na ngeallsealbhóirí tar éis glao poiblí ar léiriú spéise agus nós imeachta roghnúcháin trédhearcach. Déanfaidh comhaltaí fhóram na ngeallsealbhóirí dearbhú bliantúil maidir le leasanna, a dhéanfar a chur ar fáil go poiblí agus a thabhairt cothrom le dáta, nuair is ábhartha.

4.   Féadfaidh fóram na ngeallsealbhóirí foghrúpaí buana nó sealadacha a bhunú de réir mar is iomchuí chun ceisteanna sonracha a bhaineann le cuspóirí an Rialacháin seo a scrúdú. Déanfaidh fóram na ngeallsealbhóirí a rialacha nós imeachta a ghlacadh.

5.   Beidh cruinnithe tráthrialta ag fóram na ngeallsealbhóirí, a ndéanfaidh ionadaí ón gCoimisiún cathaoirleacht orthu.

6.   Déanfaidh fóram na ngeallsealbhóirí tuarascáil bhliantúil a ullmhú maidir lena chuid gníomhaíochtaí. Cuirfear an tuarascáil sin ar fáil go poiblí.