Artikolu 93 Forum tal-partijiet ikkonċernati

1.   B’dan qed jiġi stabbilit forum tal-partijiet ikkonċernati bl-għan li jiffaċilita l-iskambju ta’ informazzjoni u jippromwovi l-kooperazzjoni bejn il-partijiet ikkonċernati fir-rigward tal-implimentazzjoni ta’ dan ir-Regolament.

2.   Il-forum tal-partijiet ikkonċernati għandu jkollu kompożizzjoni bbilanċjata u jkun magħmul minn partijiet ikkonċernati rilevanti, inklużi rappreżentanti tal-organizzazzjonijiet tal-pazjenti, professjonisti tas-saħħa, industrija, organizzazzjonijiet tal-konsumaturi, riċerkaturi xjentifiċi u akkademja, u għandu jirrappreżenta l-fehmiet tagħhom. Meta l-interessi kummerċjali jkunu rappreżentati fil-forum tal-partijiet ikkonċernati, ir-rappreżentazzjoni ta’ tali interessi għandha tkun ibbażata fuq kombinazzjoni bbilanċjati ta’ kumpaniji kbar, intrapriżi zgħar u ta’ daqs medju u negozji ġodda. Il-kompiti tal-forum tal-partijiet ikkonċernati għandu jinkludi b’mod ugwali l-użu primarju u użu sekondarju.

3.   Il-membri tal-forum tal-partijiet ikkonċernati għandhom jinħatru mill-Kummissjoni wara sejħa għal interess pubblika u proċedura ta’ għażla trasparenti. Il-membri tal-forum ta’ partijiet ikkonċernati għandhom jagħmlu dikjarazzjoni annwali tal-interessi li għandha tkun magħmula disponibbli pubblikament u aġġornata, meta rilevanti.

4.   Il-forum tal-partijiet ikkonċernati jista’ jistabbilixxi sottogruppi permanenti jew temporanji kif ikun xieraq bl-għan li jiġu eżaminati kwistjonijiet speċifiċi relatati mal-objettivi ta’ dan ir-Regolament. Il-forum tal-partijiet ikkonċernati għandu jadotta r-regoli ta’ proċedura tiegħu stess.

5.   Il-forum tal-partijiet ikkonċernati għandu jorganizza laqgħat regolari, li għandhom ikunu ppreseduti minn rappreżentant tal-Kummissjoni.

6.   Il-forum tal-partijiet ikkonċernati għandu jħejji rapport annwali dwar l-attivitajiet tiegħu. Dan ir-rapport għandu jsir disponibbli għall-pubbliku.