Airteagal 22 Dearadh teicniúil agus oibriú an phas táirge dhigitigh

tá an pas táirge digiteach go hiomlán idir-inoibritheach le pasanna táirge digiteacha eile a cheanglaítear le dlí eile de chuid an Aontais i ndáil leis na gnéithe teicniúla, séimeantacha agus eagraíochtúla a bhaineann le cumarsáid agus le haistriú sonraí ó cheann go ceann;

tá na sonraí go léir atá sa phas táirge digiteach bunaithe ar chaighdeáin oscailte, a fhorbraítear i bhformáid idir-inoibritheach, agus tá siad, de réir mar is iomchuí, inléite ag meaisín, struchtúrtha, inchuardaithe agus inaistrithe trí líonra malartaithe sonraí idir-inoibritheach oscailte gan gaibhniú díoltóirí;

tá rochtain saor in aisce ag tomhaltóirí nó úsáideoirí deiridh eile, oibreoirí eacnamaíocha, údaráis inniúla náisiúnta, údaráis chustaim, an Coimisiún agus gníomhaithe ábhartha eile, ar bhonn a gceart rochtana faoi seach, i gcomhréir le dlí an Aontais, ar an bpas táirge digiteach;

ní cheanglaítear ar thomhaltóirí ná ar úsáideoirí deiridh eile clárú ná pasfhocal a sholáthar chun rochtain a fháil ar an bpas táirge digiteach;

is é an t-oibreoir eacnamaíoch atá freagrach as an bpas táirge digiteach a chruthú, nó soláthraithe seirbhíse pasanna táirge digiteacha, a stórálfaidh an pas táirge digiteach;

i gcás ina gcruthaítear pas táirge digiteach nua le haghaidh glantach nó le haghaidh dromchlaghníomhaí úsáideora deiridh a bhfuil pas táirge digiteach amháin nó níos mó aige cheana féin, déantar an pas táirge digiteach nua a nascadh leis na pasanna bunaidh táirge digiteacha sin;

i gcás ina ndéanann soláthraithe seirbhíse pasanna táirge digiteacha an pas táirge digiteach a stóráil de bhun phointe (e) den Airteagal seo nó a phróiseáil ar bhealach eile de bhun Airteagal 21(12), pointe (c), ní dhéanann na soláthraithe seirbhíse pasanna táirge digiteacha sin na sonraí sin a dhíol, a athúsáid ná a phróiseáil, go hiomlán nó go páirteach, thar a bhfuil riachtanach chun na seirbhísí stórála nó próiseála ábhartha a sholáthar, ach amháin má chomhaontaítear go sonrach leis an oibreoir eacnamaíoch a chuireann glantach nó dromchlaghníomhaí úsáideora deiridh ar an margadh a leithéid a dhéanamh;

ní dhéanann oibreoirí eacnamaíocha aon fhaisnéis úsáide a rianú, a anailísiú ná a úsáid ach amháin a mhéid is fíorghá chun an fhaisnéis ar an bpas táirge digiteach a sholáthar ar líne; go háirithe, ní stóráiltear sonraí pearsanta a bhaineann le tomhaltóir nó úsáideoir deiridh eile an ghlantaigh nó an dromchlaghníomhaí úsáideora deiridh sa phas táirge digiteach gan a dtoiliú sainráite a bheith tugtha i gcomhréir le hAirteagal 6 de Rialachán (AE) 2016/679 ó Pharlaimint na hEorpa agus ón gComhairle (22);

áirithítear fíordheimhniú, iontaofacht agus sláine sonraí;

déantar pasanna táirge digiteacha a dhearadh agus a oibriú ar shlí lena n-áirithítear ardleibhéal slándála agus príobháideachais agus lena seachnófar calaois.