Artikolu 22 Id-disinn tekniku u t-tħaddim tal-passaport diġitali tal-prodott

il-passaport diġitali tal-prodott huwa interoperabbli għalkollox ma' passaporti diġitali tal-prodotti oħra meħtieġa minn liġi oħra tal-Unjoni fir-rigward tal-aspetti tekniċi, semantiċi u organizzattivi tal-komunikazzjoni minn tarf sa tarf u tat-trasferiment tad-data;

id-data kollha inkluża fil-passaport diġitali tal-prodott hija bbażata fuq standards miftuħa, żviluppati b'format interoperabbli, u, fejn ikun xieraq, tista' tinqara minn magna, tkun strutturata, tista' titfittex u tkun trasferibbli permezz ta' network ta' skambju ta' data miftuħ u interoperabbli mingħajr intrappolament tal-klijentela;

il-konsumaturi jew utenti finali oħra, l-operaturi ekonomiċi, l-awtoritajiet nazzjonali kompetenti, l-awtoritajiet doganali, il-Kummissjoni u atturi rilevanti oħra għandhom aċċess bla ħlas għall-passaport diġitali tal-prodott abbażi tad-drittijiet ta' aċċess rispettivi tagħhom f'konformità mal-liġi tal-Unjoni;

il-konsumaturi u utenti finali oħra mhumiex meħtieġa jirreġistraw jew jipprovdu password biex jaċċessaw il-passaport diġitali tal-prodott;

il-passaport diġitali tal-prodott jinħażen mill-operatur ekonomiku responsabbli għall-ħolqien tiegħu jew mill-fornituri tas-servizzi tal-passaport diġitali tal-prodott;

meta jinħoloq passaport diġitali tal-prodott ġdid għal deterġent jew aġent tensjoattiv għall-utent finali li diġà jkollu passaport diġitali tal-prodott wieħed jew aktar, il-passaport diġitali tal-prodott ġdid ikun marbut ma' dawk il-passaporti diġitali tal-prodotti oriġinali;

meta l-passaport diġitali tal-prodott jinħażen skont il-punt (e) ta' dan l-Artikolu jew inkella jiġi pproċessat minn fornituri tas-servizzi tal-passaport diġitali tal-prodott skont l-Artikolu 21(12), il-punt (c), dawk il-fornituri tas-servizzi tal-passaport diġitali tal-prodott ma jbigħux, jużaw mill-ġdid jew jipproċessaw tali data, kompletament jew parzjalment, lil hinn minn dak meħtieġ għall-forniment tas-servizzi rilevanti tal-ħżin jew tal-ipproċessar, sakemm mhux bi qbil speċifiku mal-operatur ekonomiku li jintroduċi d-deterġent jew l-aġent tensjoattiv għall-utent finali fis-suq;

l-operaturi ekonomiċi ma jittraċċaw, ma janalizzaw jew ma jużaw l-ebda informazzjoni dwar l-użu għajr kif assolutament meħtieġ għall-finijiet tal-għoti tal-informazzjoni dwar il-passaport diġitali tal-prodott online; b'mod partikolari, id-data personali relatata mal-konsumatur jew ma' utent finali ieħor tad-deterġent jew l-aġent tensjoattiv għall-utent finali ma tkunx maħżuna fil-passaport diġitali tal-prodott mingħajr il-kunsens espliċitu tagħha mogħti f'konformità mal-Artikolu 6 tar-Regolament (UE) 2016/679 tal-Parlament Ewropew u tal-Kunsill (22);

l-awtentikazzjoni, l-affidabbiltà u l-integrità tad-data huma żgurati;

il-passaporti diġitali tal-prodotti jitfasslu u jitħaddmu b'tali mod li jiġi żgurat livell għoli ta' sigurtà u ta' privatezza u tiġi evitata l-frodi.