Airteagal 23 Iompróirí sonraí agus aitheantóirí uathúla

1.   Comhlíonfaidh an t-iompróir sonraí, na haitheantóirí táirge uathúla agus na haitheantóirí oibreora uathúla a cheanglaítear de bhun an Rialacháin seo na caighdeáin is infheidhme maidir le hiompróirí sonraí, aitheantóirí táirge uathúla agus aitheantóirí oibreora uathúla de bhun Rialachán (AE) 2024/1781.

2.   I gcás nach bhfuil aitheantóir oibreora uathúil ar fáil go fóill, beidh feidhm ag Airteagal 12(2) de Rialachán (AE) 2024/1781 maidir le hoibreoirí eacnamaíocha a chruthaíonn nó a nuashonraíonn pas táirge digiteach faoin Rialachán seo. Aon rialacha agus nósanna imeachta maidir le bainistiú saolré aitheantóirí uathúla agus iompróirí sonraí a leagtar amach i ngníomhartha tarmligthe arna nglacadh de bhun Airteagal 12(4) de Rialachán (AE) 2024/1781, beidh feidhm acu freisin maidir le haitheantóirí uathúla agus iompróirí sonraí faoin Rialachán seo.

3.   I gcás ina bhfuil glantach nó dromchlaghníomhaí faoi réir oibleagáide foráil a dhéanamh maidir le pas táirge digiteach faoi ghníomh tarmligthe arna ghlacadh de bhun Airteagal 4 de Rialachán (AE) 2024/1781 nó faoi dhlí eile de chuid an Aontais, is mar an gcéanna a bheidh an t-aitheantóir táirge uathúil dá dtagraítear in Airteagal 24(2), an chéad fhomhír, den Rialachán seo, an t-aitheantóir oibreora uathúil agus an t-aitheantóir clárúcháin uathúil.

4.   Beidh feidhm freisin chun críocha an Rialacháin seo ag aon nós imeachta chun dintiúir dhigiteacha oibreoirí eacnamaíocha agus gníomhaithe ábhartha eile a eisiúint agus a fhíorú a bhfuil cearta rochtana acu ar shonraí a áirítear sa phas táirge digiteach agus a bhunaítear le gníomhartha cur chun feidhme arna nglacadh de bhun Airteagal 11, an ceathrú fomhír, de Rialachán (AE) 2024/1781.

5.   Beidh feidhm freisin chun críocha an Rialacháin seo ag aon cheanglas nach mór do sholáthraithe seirbhíse pasanna táirge digiteacha a chomhlíonadh chun bheith ina soláthraithe den sórt sin, agus, i gcás inarb iomchuí, chun na seirbhísí sin a sholáthar, a leagtar amach i ngníomhartha tarmligthe arna nglacadh de bhun Airteagal 11, an tríú fomhír, de Rialachán (AE) 2024/1781.