Artikolu 23 Mezzi ta' data u identifikaturi uniċi

1.   Il-mezz ta' data, l-identifikaturi uniċi tal-prodott u l-identifikaturi uniċi tal-operatur meħtieġa skont dan ir-Regolament għandhom jikkonformaw mal-istandards applikabbli għall-mezzi ta' data, għall-identifikaturi uniċi tal-prodott u għall-identifikaturi uniċi tal-operatur skont ir-Regolament (UE) 2024/1781.

2.   Meta identifikatur uniku tal-operatur ikun għadu mhux disponibbli, l-Artikolu 12(2) tar-Regolament (UE) 2024/1781 għandu japplika għall-operaturi ekonomiċi li joħolqu jew jaġġornaw passaport diġitali tal-prodott skont dan ir-Regolament. Kwalunkwe regola u proċedura għall-ġestjoni taċ-ċiklu tal-ħajja ta' identifikaturi uniċi u mezzi ta' data stabbiliti fl-atti delegati adottati skont l-Artikolu 12(4) tar-Regolament (UE) 2024/1781 għandhom japplikaw ukoll fir-rigward ta' identifikaturi uniċi u mezzi ta' data skont dan ir-Regolament.

3.   Meta deterġent jew aġent tensjoattiv ikun soġġett għal obbligu li jiġi previst passaport diġitali tal-prodott skont att delegat adottat skont l-Artikolu 4 tar-Regolament (UE) 2024/1781 jew skont liġi oħra tal-Unjoni, l-identifikatur uniku tal-prodott, l-identifikatur uniku tal-operatur u l-identifikatur uniku tar-reġistrazzjoni msemmija fl-Artikolu 24(2), l-ewwel subparagrafu, ta' dan ir-Regolament għandhom ikunu l-istess.

4.   Kwalunkwe proċedura għall-ħruġ u l-verifika tal-kredenzjali diġitali tal-operaturi ekonomiċi u ta' atturi rilevanti oħra li għandhom drittijiet ta' aċċess għad-data inkluża fil-passaport diġitali tal-prodott, u li huma stabbiliti mill-atti ta' implimentazzjoni adottati skont l-Artikolu 11, ir-raba' subparagrafu, tar-Regolament (UE) 2024/1781, għandha tkun applikabbli wkoll għall-finijiet ta' dan ir-Regolament.

5.   Kwalunkwe rekwiżit li l-fornituri tas-servizzi tal-passaport diġitali tal-prodott għandu jkunu konformi miegħu biex isiru tali fornituri, u, fejn xieraq, sabiex jipprovdu tali servizzi, stabbiliti f'atti delegati adottati skont l-Artikolu 11, it-tielet subparagrafu, tar-Regolament (UE) 2024/1781 għandhom ikunu applikabbli wkoll għall-finijiet ta' dan ir-Regolament.