Airteagal 24 Clárlann na bpasanna táirge digiteacha

1.   Sula gcuirfear glantach nó dromchlaghníomhaí úsáideora deiridh ar an margadh, uaslódálfaidh an t-oibreoir eacnamaíoch ábhartha, sa chlárlann a bhunaítear faoi Airteagal 13(1) de Rialachán (AE) 2024/1781, an t-aitheantóir táirge uathúil agus an t-aitheantóir oibreora uathúil don ghlantach nó don dromchlaghníomhaí úsáideora deiridh.

I gcás glantach nó dromchlaghníomhaithe úsáideora deiridh a bheartaítear a chur faoin nós imeachta custaim ‘scaoileadh i saorchúrsaíocht’, stórálfaidh an chlárlann cód tráchtearra an ghlantaigh nó an dromchlaghníomhaí úsáideora deiridh freisin.

2.   Tráth a dhéanann an t-oibreoir eacnamaíoch na sonraí dá dtagraítear i mír 1 a uaslódáil sa chlárlann, déanfaidh an chlárlann aitheantóir clárúcháin uathúil a bhaineann leis na haitheantóirí arna n-uaslódáil sa chlárlann le haghaidh glantach sonrach nó dromchlaghníomhaí úsáideora deiridh sonrach a chur in iúl go huathoibríoch don oibreoir eacnamaíoch (aitheantóir clárúcháin ’uathúil). Ní mheasfar an chumarsáid sin ón gclárlann a bheith ina cruthúnas ar chomhlíontacht leis an Rialachán seo ná le dlí de chuid an Aontais.

Féadfaidh an Coimisiún gníomh cur chun feidhme a ghlacadh lena sonrófar na socruithe cur chun feidhme don chlárlann, lena n-áirítear an t-aitheantóir uathúil clárúcháin. Déanfar an gníomh cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 32(2).

3.   Beidh rochtain ag an gCoimisiún, ag na húdaráis náisiúnta inniúla agus ag na húdaráis chustaim ar an gclárlann chun a ndualgais a chomhlíonadh de bhun an Rialacháin seo.