Airteagal 43 Liosta d’fheidhmeanna poiblí suntasacha

1.   Déanfaidh gach Ballstát liosta a eisiúint agus a choimeád cothrom le dáta ina gcuirfear in iúl na feidhmeanna beachta a cháilíonn, de réir a dhlíthe náisiúnta, a rialachán náisiúnta agus a fhorálacha riaracháin náisiúnta, mar fheidhmeanna poiblí suntasacha chun críocha Airteagal 2(1), pointe (34)5. Iarrfaidh na Ballstáit ar gach eagraíocht idirnáisiúnta atá creidiúnaithe ar a gcríoch liosta feidhmeanna suntasacha ag an eagraíocht idirnáisiúnta sin a eisiúint agus a choimeád cothrom le dáta chun críocha Airteagal 2(1), pointe (3). Áireofar sna liostaí sin freisin aon fheidhm a fhéadfar a thabhairt d’ionadaithe tríú tíortha agus ionadaithe comhlachtaí idirnáisiúnta atá creidiúnaithe ar leibhéal an Bhallstáit. Tabharfaidh Ballstát fógra faoi na liostaí sin, chomh maith le haon athrú a dhéanfar orthu, don Choimisiún agus do AMLA.

2.   Féadfaidh an Coimisiún, trí bhíthin gníomh cur chun feidhme, an fhormáid a leagan amach chun liostaí na mBallstát d’fheidhmeanna poiblí suntasacha a bhunú agus a chur in iúl de bhun mhír 1. Glacfar an gníomh cur chun feidhme sin i gcomhréir leis an nós imeachta scrúdúcháin dá dtagraítear in Airteagal 86(2).

3.   Tugtar an chumhacht don Choimisiún gníomhartha tarmligthe a ghlacadh i gcomhréir le hAirteagal 85 chun Airteagal 2(1), pointe (34), a fhorlíonadh i gcás ina sainaithnítear, sna liostaí ar thug Ballstáit fógra ina leith de bhun mhír 1, catagóirí coiteanna breise d’fheidhmeanna poiblí suntasacha agus go bhfuil na catagóirí sin d’fheidhmeanna poiblí suntasacha ábhartha don Aontas ina iomláine.

Agus gníomhartha tarmligthe á dtarraingt suas de bhun na chéad fhomhíre, rachaidh an Coimisiún i gcomhairle le AMLA.

4.   Déanfaidh an Coimisiún liosta na bhfeidhmeanna beachta a cháilíonn mar fheidhmeanna poiblí suntasacha ar leibhéal an Aontais a tharraingt suas agus a choimeád cothrom le dáta. Áireofar sa liosta sin freisin aon fheidhm a fhéadfar a thabhairt d’ionadaithe tríú tíortha agus ionadaithe comhlachtaí idirnáisiúnta atá creidiúnaithe ar leibhéal an Aontais.

5.   Cuirfidh an Coimisiún, bunaithe ar na liostaí dá bhforáiltear i mír 1 agus mír 4 den Airteagal seo, liosta aonair i dtoll a chéile de gach feidhm phoiblí shuntasach chun críocha Airteagal 2(1), pointe (34). Foilseoidh an Coimisiún an liosta aonair sin in Iris Oifigiúil an Aontais Eorpaigh. Cuirfidh AMLA an liosta sin ar fáil go poiblí ar a shuíomh gréasáin.