Preamble: 1

(1)

Chun a áirithiú go dtuairisceoidh eintitis airgeadais mórtheagmhais dá n-údaráis inniúla ar bhealach comhsheasmhach agus chun a áirithiú go soláthróidh siad sonraí ar ardchaighdeán do na húdaráis sin, ba cheart a shonrú cé na réimsí sonraí is gá d’eintitis airgeadais a sholáthar ag na céimeanna éagsúla den tuairisciú dá dtagraítear in Airteagal 19(4) de Rialachán (AE) 2022/2554. Tá sé tábhachtach go gcuirfí an fhaisnéis sin i láthair ar bhealach a fhágann gur féidir forléargas amháin a thabhairt ar an teagmhas. Is gá, dá bhrí sin, teimpléad tuairiscithe aonair a leagan síos chun na gcríoch sin.

(2)

Ba cheart d’eintitis airgeadais na réimsí sonraí sin den teimpléad tuairiscithe a chomhfhreagraíonn do cheanglais faisnéise an fhógra nó na tuarascála faoi seach a chomhlánú. Ba cheart cead a bheith ag eintitis airgeadais a bhfuil faisnéis acu cheana féin atá le soláthar acu ag céim tuairiscithe níos déanaí, i.e. sa tuarascáil idirmheánach nó sa tuarascáil chríochnaitheach, cur isteach na sonraí a réamh-mheas, áfach.

(3)

Ós rud é go bhféadfadh teagmhais iolracha nó atarlaithe a bheith ina mórtheagmhas dá dtagraítear in Airteagal 8 de Rialachán Tarmligthe (AE) 2024/1772 ón gCoimisiún (2), ba cheart dearadh an teimpléid tuairiscithe agus na réimsí sonraí a chur ar a gcumas d’eintitis airgeadais teagmhais atarlaithe den sórt sin a thuairisciú.

(4)

Chun faisnéis chruinn agus cothrom le dáta a áirithiú, ba cheart don teimpléad tuairiscithe é a chur ar a gcumas d’eintitis airgeadais, agus an tuarascáil idirmheánach agus chríochnaitheach á cur isteach acu, aon fhaisnéis a cuireadh isteach roimhe sin a thabhairt cothrom le dáta, agus i gcás inar gá mórtheagmhais a athaicmiú mar theagmhais nach mórtheagmhais iad.

(5)

Ba cheart sainaithint dhlíthiúil eintiteas a ailíniú leis na haitheantóirí a shonraítear sna caighdeáin theicniúla cur chun feidhme arna nglacadh de bhun Airteagal 28(9) de Rialachán (AE) 2022/2554.

(6)

I gcás ina ndéanann eintitis airgeadais na móroibleagáidí tuairiscithe teagmhas a bhaineann le TFC a sheachfhoinsiú chuig tríú páirtí, ba cheart d’údaráis inniúla a bheith ar an eolas faoi chéannacht an tuairiscithe tríú páirtí thar ceann an eintitis airgeadais sula gcuirtear isteach an chéad fhógra nó an chéad tuairisciú, chun dlisteanacht an tuairiscithe tríú páirtí a fhíorú.

(7)

Chun tionchar teagmhais a tharla ag soláthraí tríú páirtí, nó arbh é soláthraí tríú páirtí ba chúis leis, a shainaithint go héasca, ar teagmhas é a dhéanann difear d’eintitis airgeadais iomadúla laistigh de Bhallstát aonair, agus chun an iarracht tuairiscithe d’eintitis airgeadais a laghdú, ba cheart a cheadú leis an teimpléad tuairiscithe tuarascáil chomhiomlánaithe a chur isteach lena gcumhdaítear faisnéis chomhiomlánaithe faoi thionchar an teagmhais ar na heintitis airgeadais uile a ndearnadh difear dóibh agus a d’aicmigh an teagmhas mar mhórtheagmhas.

(8)

Ba cheart an teimpléad tuairiscithe a dhearadh ar bhealach atá neodrach ó thaobh na teicneolaíochta de ionas gur féidir é a chur chun feidhme i réitigh éagsúla tuairiscithe teagmhas atá ann cheana nó a d’fhéadfaí a fhorbairt chun ceanglais Rialachán (AE) 2022/2554 a chur chun feidhme.

(9)

Le dearadh an teimpléid tuairiscithe agus na réimsí sonraí, ba cheart éascú a dhéanamh ar thuairisciú mórtheagmhas a bhaineann le TFC ag tríú páirtithe ar sheachfhoinsigh eintitis airgeadais a n-oibleagáid tuairiscithe chucu i gcomhréir le hAirteagal 19(5) de Rialachán (AE) 2022/2554.

(10)

Tá an Rialachán sin bunaithe ar na dréachtchaighdeáin theicniúla cur chun feidhme a chuir na hÚdaráis Maoirseachta Eorpacha faoi bhráid an Choimisiúin.

(11)

Rinne na hÚdaráis Mhaoirseachta Eorpacha comhairliúcháin phoiblí oscailte a reáchtáil maidir leis na dréachtchaighdeáin theicniúla cur chun feidhme ar a bhfuil an Rialachán sin bunaithe, rinne siad anailís ar na costais agus ar na tairbhí a d’fhéadfadh a bheith ag baint leo ann agus d’iarr siad comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialacháin (AE) Uimh. 1093/2010 (3), (AE) Uimh. 1094/2010 (4), (AE) Uimh. 1095/2010 (5) ó Pharlaimint na hEorpa agus ón gComhairle.

(12)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (6) agus thug sé tuairim dhearfach uaidh an 22 Iúil 2024. Aon phróiseáil ar shonraí pearsanta a thagann faoi raon feidhme an Rialacháin sin, ba cheart í a dhéanamh i gcomhréir leis na prionsabail agus na forálacha is infheidhme maidir le cosaint sonraí a leagtar amach i Rialachán 2018/1725,