9. Cáilíocht sonraí

Ba cheart do ghnólachtaí infheistíochta agus d’údaráis inniúla iomláine agus inchreidteacht na sonraí tagarmharcála a thuairiscítear a sheiceáil, agus na sonraíochtaí in Iarscríbhinn VI á gcur san áireamh, sula ndéanfar na sonraí sin a thuairisciú don údarás inniúil agus a chur faoi bhráid an ÚBE faoi seach.

I gcás ina bhfuil athruithe móra ar shonraí tagarmharcála le himeacht ama, ba cheart go mbeadh an gnólacht infheistíochta agus na húdaráis inniúla in ann mínithe a sholáthar.

Ba cheart do ghnólachtaí infheistíochta agus d’údaráis inniúla a áirithiú go mbeidh suim fhoshuímh an luacha saothair athraithigh agus seasta comhionann leis na méideanna iomlána.

Agus inchreidteacht sonraí tagarmharcála á seiceáil acu, ba cheart d’údaráis inniúla méid agus líon fostaithe na gnólachta infheistíochta agus na gnáthleibhéil luacha saothair a chur san áireamh. Ba cheart obair leantach a dhéanamh ar shonraí dochreidte arna n-aithint agus iad a cheartú sula gcuirtear na sonraí isteach.

I gcás inar dealraitheach go bhfuil sonraí tagarmharcála dochreidte, ach go bhfuil siad ceart i ndáiríre, ba cheart d'údaráis inniúla an ÚBE a chur ar an eolas faoi na bunchúiseanna.

Maidir le sonraí tagarmharcála a cuireadh isteach a thaispeánann saincheisteanna féideartha faoi cháilíocht na sonraí nó a mheastar a bheith dochreidte, féadfaidh an ÚBE iarraidh ar na húdaráis inniúla athbhreithniú a dhéanamh ar na sonraí nó an fhaisnéis is gá a sholáthar chun na sonraí a léirmhíniú i gceart.

Ba cheart do na húdaráis inniúla sonraí ceartaithe nó mínithe ar aon sonraí dochreidte a sholáthar, de réir mar is gá, a luaithe is féidir. Ba cheart d’údaráis inniúla comhoibriú go dlúth leis an ÚBE chun a áirithiú go bhfuil an tacar sonraí don anailís cobhsaí agus ar cháilíocht mhaith faoin 30 Meán Fómhair, ar a dhéanaí, den bhliain inar tuairiscíodh sonraí.

Agus sonraí tagarmharcála á gcur faoi bhráid an ÚBE i gcomhréir leis na Treoirlínte seo, ba cheart d’údaráis inniúla a áirithiú go gcomhlíonfaidh siad freisin EBA/DC/335 an 5 Meitheamh 2020 maidir le EUCLID (‘Cinneadh EUCLID’)⁷ arna leasú agus go soláthraíonn siad do ghnólachtaí infheistíochta aon sonraíocht theicniúil is gá chun sonraí tagarmharcála i gcomhréir leis an gcinneadh sin a chur isteach.

⁷ https://www.eba.europa.eu/sites/default/documents/files/document_library/Risk%20Analysis%20and%20Data/Reporting %20by%20Authorities/885459/Decision%20on%20the%20European%20Centralised%20Infrastructure%20of%20Data%20% 28EUCLID%29.pdf