4.4 Tréimhsiúlacht an athbhreithnithe agus an nuashonraithe

Chun a áirithiú go gcoinneofar pleananna fuascailte oibríochtúil agus éifeachtach i gcónaí, ba cheart d’eisitheoirí pleananna den sórt sin a athbhreithniú agus a thabhairt cothrom le dáta go rialta, lena n-áirítear i gcásanna athruithe ábhartha a dhéanann difear don eisitheoir nó dá thimpeallacht ghnó mar a thuairiscítear a thuilleadh i mír 79, agus an plean fuascailte athbhreithnithe a chur faoi bhráid an údaráis inniúil lena mheasúnú. Ba cheart athbhreithniú pras tráthúil ar an bplean fuascailte a bheith mar thoradh ar aon athrú ar an bplean téarnaimh chun a mheas an bhfuil sé fós comhsheasmhach leis an leagan nua den phlean téarnaimh.

Ba cheart a chur san áireamh i minicíocht an athbhreithnithe prionsabal na comhréireachta mar a chuirtear in iúl i mír 12 agus an treoir maidir le minicíocht an athbhreithnithe ar an bplean fuascailte de réir mhíreanna 13 agus 14.

Ba cheart don eisitheoir an plean fuascailte a athbhreithniú agus a thabhairt cothrom le dáta go pras freisin tráth a tharlaíonn athruithe ábhartha, go háirithe maidir leis an méid seo a leanas:

• i. samhail ghnó nó struchtúr eagraíochtúil an eisitheora;
• ii. cineál an dearbháin, lena n-áirítear na cearta agus na hoibleagáidí a ghabhann leis an dearbhán;
• iii. dálaí margaidh a dhéanann difear don eisitheoir nó don chúlchiste sócmhainní nó d’úsáid an chomhartha;
• iv. teacht chun cinn aon leochaileachta anaithnide, go háirithe i ndáil le riosca TFC nó cibirionsaí, a mbeadh neamhéifeachtacht an phlean mar thoradh air; agus
• v. gnéithe dlíthiúla, rialála nó maoirseachta.