1. L-Istati Membri għandhom jiżguraw li l-awtoritajiet kompetenti jkollhom aċċess immedjat u dirett mingħajr ħlas għall-informazzjoni li tippermetti l-identifikazzjoni f'waqtha ta' kwalunkwe proprjetà immobbli u tal-persuni fiżiċi jew l-entitajiet ġuridiċi jew l-arranġamenti ġuridiċi li jippossjedu dik il-proprjetà, kif ukoll għal informazzjoni li tippermetti l-identifikazzjoni u l-analiżi ta' tranżazzjonijiet li jinvolvu proprjetà immobbli. Dak l-aċċess għandu jiġi pprovdut permezz ta' punt uniku ta' aċċess li għandu jiġi stabbilit f'kull Stat Membru li jippermetti lill-awtoritajiet kompetenti jaċċessaw, permezz ta' mezzi elettroniċi, informazzjoni f'format diġitali, li, fejn possibbli, għandha tkun tista' tinqara mill-magni.
L-aċċess għall-punti uniċi ta' aċċess imsemmija fl-ewwel subparagrafu għandu jingħata wkoll lill-AMLA għall-finijiet ta’ analiżi konġunta skont l-Artikolu 32 ta' din id-Direttiva u l-Artikolu 40 tar-Regolament (UE) 2024/1620.