Artikolu 15 Għaqdiet, diviżjonijet u riorganizzazzjonijiet

1.   Fil-każ ta' għaqda, diviżjoni jew riorganizzazzjoni li tista' taffettwa li jiġu ssodisfati l-obbligi statistiċi tagħhom, l-aġenti li jirraportaw ikkonċernati għandhom jinformaw lill-BĊN rilevanti bil-proċeduri li huma ppjanati biex jiġu ssodisfati r-rekwiżiti tar-rapportar statistiku stabbiliti f'dan ir-Regolament, hekk kif tkun ġiet ippubblikata l-intenzjoni li tiġi implimentata l-għaqda, diviżjoni jew riorganizzazzjoni u qabel ma tidħol fis-seħħ.

2.   Mingħajr preġudizzju għall-obbligi previsti fil-paragrafu preċedenti, il-BĊN rilevanti jista' jawtorizza l-istituzzjoni akkwirenti biex twettaq l-obbligu tagħha ta' rapportar statistiku permezz ta' proċeduri temporanji. Din l-eżenzjoni mill-proċeduri ta' rapportar normali m'għandhiex tkun itwal minn sitt xhur mid-data meta tkun seħħet il-għaqda, diviżjoni jew riorganizzazzjoni. Din l-eżenzjoni għandha tkun mingħajr preġudizzju għall-obbligu tal-istituzzjoni akkwirenti li tosserva l-obbligi ta' rapportar tagħha skont dan ir-Regolament.