Artikolu 77

L-Awtorità għandha timponi tariffa superviżorja annwali fuq l-entitajiet marbuta b’obbligu magħżula kollha msemmija fl-Artikolu 13 u fuq l-entitajiet marbuta b’obbligu mhux magħżula li jissodisfaw il-kriterji stabbiliti fl-Artikolu 12(1). It-tariffi għandhom ikopru n-nefqa mġarrba mill-Awtorità fir-rigward tal-kompiti relatati mas-superviżjoni u msemmija fil-Kapitolu II, it-Taqsimiet 3 u 4. Dawk it-tariffi ma għandhomx jaqbżu n-nefqa relatata ma’ dawk il-kompiti. Meta dawk il-kriterji ma jiġux irrispettati b’mod sħiħ fi kwalunkwe sena partikolari, l-aġġustamenti meħtieġa għandhom isiru meta jiġu kkalkolati t-tariffi għas-sentejn ta’ wara.

L-ammont tat-tariffa imposta fuq kull entità marbuta b’obbligu msemmija fil-paragrafu 1 għandu jiġi kkalkulat f’konformità mal-arranġamenti stabbiliti fl-att delegat imsemmi fil-paragrafu 6.

It-tariffi għandhom jiġu kkalkolati fl-ogħla livell ta’ konsolidazzjoni fl-Unjoni f’konformità mal-istandards kontabilistiċi applikabbli.

Il-bażi għall-kalkolu tat-tariffa superviżorja annwali għal sena kalendarja partikolari għandha tkun in-nefqa relatata mas-superviżjoni diretta u indiretta tal-entitajiet marbuta b’obbligu magħżula u mhux magħżula soġġetti għal tariffi f’dik is-sena. L-Awtorità tista’ titlob pagamenti bil-quddiem fir-rigward tat-tariffa superviżorja annwali, li għandha tkun ibbażata fuq stima raġonevoli. L-Awtorità għandha tikkomunika mas-superviżur finanzjarju rilevanti qabel ma tiddeċiedi dwar il-livell tat-tariffa finali sabiex tiżgura li s-superviżjoni tibqa’ kosteffettiva u raġonevoli għall-entitajiet kollha marbuta b’obbligu tas-settur finanzjarju. L-Awtorità għandha tikkomunika lill-entitajiet marbuta b’obbligu kkonċernati l-bażi għall-kalkolu tat-tariffa superviżorja annwali. L-Istati Membri għandhom jiżguraw li l-obbligu li jitħallsu t-tariffi speċifikati f’dan l-Artikolu jkun infurzabbli skont il-liġi nazzjonali, u li t-tariffi dovuti jitħallsu kollha.

Dan l-Artikolu huwa mingħajr preġudizzju għad-dritt tas-superviżuri finanzjarji li jimponu tariffi f’konformità mal-liġi nazzjonali, sal-punt li ma jkunux ġew konferiti kompiti superviżorji lill-Awtorità, jew fir-rigward tal-kostijiet tal-kooperazzjoni mal-Awtorità u l-assistenza tagħha u waqt li jaġixxu fuq l-istruzzjonijiet tagħha, f’konformità mal-liġi applikabbli tal-Unjoni.

Il-Kummissjoni għandha s-setgħa li tadotta att delegat f’konformità mal-Artikolu 100 biex tissupplimenta dan ir-Regolament billi tispeċifika l-metodoloġija għall-kalkolu tal-ammont tat-tariffa imposta fuq kull entità marbuta b’obbligu magħżula u mhux magħżula soġġetta għal tariffi f’konformità mal-paragrafu 1 ta’ dan l-Artikolu, u l-proċedura għall-ġbir ta’ dawk it-tariffi. Meta tkun qiegħda tiżviluppa l-metodoloġija għad-determinazzjoni tal-ammont individwali tat-tariffi, il-Kummissjoni għandha tqis dan li ġej:

Il-Kummissjoni għandha tadotta l-atti delegati msemmija fl-ewwel subparagrafu sal-1 ta’ Jannar 2027.