Artikolu 13 Valutazzjoni tar-riżolvibbiltà

1.   L-Istati Membri għandhom jiżguraw li l-awtoritajiet ta' riżoluzzjoni, wara li jkunu kkonsultaw lill-awtorità superviżorja, jivvalutaw sa liema punt l-impriżi tal-assigurazzjoni jew tar-riassigurazzjoni li ma jkunux parti minn grupp ikunu riżolvibbli mingħajr is-suppożizzjoni ta' kwalunkwe għajnuna finanzjarja pubblika straordinarja minbarra, fejn disponibbli u applikabbli, l-użu ta' skemi ta' garanzija tal-assigurazzjoni jew ta' kwalunkwe arranġament ta' finanzjament.

Impriża tal-assigurazzjoni jew tar-riassigurazzjoni għandha titqies riżolvibbli meta jkun fattibbli u kredibbli li dik l-impriża tiġi stralċata skont proċedimenti normali ta' insolvenza, jew li l-awtorità ta' riżoluzzjoni tirriżolvi dik l-impriża billi tapplika għaliha l-għodod ta' riżoluzzjoni differenti u l-eżerċizzju tas-setgħat ta' riżoluzzjoni.

2.   Meta awtorità ta' riżoluzzjoni tikkonkludi li azzjoni ta' riżoluzzjoni tista' tkun meħtieġa fl-interess pubbliku minħabba li l-istralċ skont proċedimenti normali ta' insolvenza ma jilħaqx l-objettivi ta' riżoluzzjoni sal-istess punt, hija għandha tipproċedi għall-istadji konsekuttivi li ġejjin:

3.   L-awtoritajiet ta' riżoluzzjoni għandhom jagħmlu l-valutazzjoni tar-riżolvibbiltà msemmija fil-paragrafu 1 fl-istess ħin tat-tfassil u l-aġġornament tal-pjan ta' riżoluzzjoni f'konformità mal-Artikolu 9, u għall-fini ta' tali tfassil u aġġornament. Meta jwettqu l-valutazzjoni msemmija fil-paragrafu 1, l-awtoritajiet ta' riżoluzzjoni, minn tal-anqas, għandhom jeżaminaw id-dimensjonijiet tar-riżolvibbiltà speċifikati fl-Anness.

4.   Għall-finijiet tal-valutazzjoni tar-riżolvibbiltà, l-awtoritajiet ta' riżoluzzjoni jistgħu jitolbu lill-impriżi tal-assigurazzjoni jew tar-riassigurazzjoni jipprovdu l-informazzjoni kollha meħtieġa.

5.   L-EIOPA għandha, sad-29 ta’ Jannar 2027, toħroġ linji gwida f'konformità mal-Artikolu 16 tar-Regolament (UE) Nru 1094/2010 biex tispeċifika kwistjonijiet u kriterji ulterjuri għall-valutazzjoni tar-riżolvibbiltà tal-impriżi jew il-gruppi tal-assigurazzjoni u tar-riassigurazzjoni previsti fil-paragrafu 1 ta' dan l-Artikolu u fl-Artikolu 14 ta’ din id-Direttiva.