4. L-awtoritajiet ta' riżoluzzjoni li jsibu li l-miżuri proposti minn impriża tal-assigurazzjoni jew tar-riassigurazzjoni f'konformità mal-paragrafu 3, ma jnaqqsux jew ma jneħħux b'mod effettiv l-impediment ikkonċernat, għandhom, direttament jew indirettament permezz tal-awtorità superviżorja, jirrikjedu li l-impriża tal-assigurazzjoni jew tar-riassigurazzjoni tieħu kwalunkwe waħda mill-miżuri alternattivi stabbiliti fil-paragrafu 5, u tinnotifika tali miżuri bil-miktub lil dik l-impriża, li għandha tipproponi pjan għall-konformità ma' dawk ir-rekwiżiti fi żmien xahar minn meta tirċievi tali notifika.
Meta jidentifikaw miżuri alternattivi, l-awtoritajiet ta' riżoluzzjoni għandhom juru kif il-miżuri proposti mill-impriża tal-assigurazzjoni jew tar-riassigurazzjoni ma jkunux kapaċi jneħħu l-impedimenti għar-riżolvibbiltà u kif il-miżuri alternattivi proposti jkunu proporzjonati fit-tneħħija ta' dawk l-impedimenti. L-awtoritajiet ta' riżoluzzjoni għandhom iqisu l-effett tal-miżuri fuq in-negozju tal-impriża tal-assigurazzjoni jew tar-riassigurazzjoni, fuq l-istabbiltà tagħha u fuq il-kapaċità tagħha li tikkontribwixxi għall-ekonomija.