Artikolu 44 Ġestjoni speċjali

1.   L-Istati Membri għandhom jiżguraw li l-awtoritajiet ta' riżoluzzjoni jkunu jistgħu jaħtru maniġer speċjali sabiex jissostitwixxi l-korp amministrattiv, maniġerjali jew superviżorju tal-impriża taħt riżoluzzjoni. L-Istati Membri għandhom jiżguraw ukoll li l-maniġer speċjali jkollu l-kwalifiki, l-abbiltà u l-għarfien sabiex iwettaq il-funzjonijiet tiegħu. L-Istati Membri jistgħu jipprevedu li awtorità ta' riżoluzzjoni tista' taħtar diversi maniġers speċjali.

2.   Il-maniġer speċjali għandu jkollu s-setgħat kollha tal-azzjonisti u tal-korp amministrattiv, maniġerjali jew superviżorju tal-impriża taħt riżoluzzjoni. Il-maniġer speċjali għandu jeżerċita dawk is-setgħat taħt il-kontroll tal-awtorità ta' riżoluzzjoni. L-awtorità ta' riżoluzzjoni tista' tillimita l-azzjonijiet tal-maniġer speċjali jew teħtieġ kunsens minn qabel għal ċerti atti.

L-awtorità ta' riżoluzzjoni għandha tippubblika l-ħatra msemmija fil-paragrafu 1 u t-termini u l-kundizzjonijiet marbutin ma' dik il-ħatra.

3.   Il-maniġer speċjali għandu jkollu d-dmir statutorju li jieħu l-miżuri kollha neċessarji sabiex jippromwovi l-objettivi ta' riżoluzzjoni u jimplimenta azzjonijiet ta' riżoluzzjoni meħudin mill-awtorità ta' riżoluzzjoni. Fil-każ ta' inkonsistenza jew ta' kunflitt ma' kwalunkwe dmir ieħor ta' ġestjoni stabbilit fl-istatuti tal-impriża jew fil-liġi nazzjonali, dak id-dmir statutorju għandu jipprevali fuq tali dmir ieħor.

4.   L-Istati Membri għandhom jeħtieġu li l-maniġer speċjali jfassal rapporti għall-awtorità ta' riżoluzzjoni li tkun ħatritu jew ħatritha f'intervalli regolari stabbiliti mill-awtorità ta' riżoluzzjoni u fil-bidu u fi tmiem il-mandat tiegħu jew tagħha. Dawk ir-rapporti għandhom jiddeskrivu fid-dettall il-pożizzjoni finanzjarja tal-impriża taħt riżoluzzjoni u jiddikjaraw ir-raġunijiet għall-miżuri meħudin.

5.   Il-maniġer speċjali ma għandux jinħatar jew ma għandhiex tinħatar għal aktar minn sena. Dan il-perjodu jista' jiġġedded, jekk l-awtorità ta' riżoluzzjoni tiddetermina li l-kondizzjonijiet għall-ħatra ta' maniġer speċjali jkunu għadhom sodisfatti.

6.   L-awtorità ta' riżoluzzjoni tista' tneħħi lill-maniġer speċjali fi kwalunkwe ħin.