Airteagal 44 Bainistíocht speisialta

1.   Áiritheoidh na Ballstáit go bhféadfaidh na húdaráis réitigh bainisteoir speisialta a cheapadh in ionad chomhlacht riaracháin, bainistíochta nó maoirseachta an ghnóthais faoi réiteach. Áiritheoidh na Ballstáit chomh maith go bhfuil na cáilíochtaí, an cumas agus an t-eolas ag an mbainisteoir speisialta chun a chuid nó a cuid feidhmeanna a chomhlíonadh. Féadfaidh na Ballstáit a fhoráil go bhféadfaidh údarás réitigh roinnt bainisteoirí speisialta a cheapadh.

2.   Beidh cumhachtaí uile scairshealbhóirí agus chomhlacht riaracháin, bainistíochta nó maoirseachta an ghnóthais faoi réiteach ag an mbainisteoir speisialta. Déanfaidh an bainisteoir speisialta na cumhachtaí sin a fheidhmiú faoi rialú an údaráis réitigh. Féadfaidh an t-údarás réitigh teorainn a chur le gníomhaíochtaí an bhainisteora speisialta nó toiliú a éileamh roimh ré do ghníomhartha áirithe.

Maidir leis an gceapachán dá dtagraítear i mír 1 agus na téarmaí agus coinníollacha a ghabhann leis an gceapachán sin, déanfaidh an t-údarás réitigh iad a phoibliú.

3.   Beidh dualgas reachtúil ar an mbainisteoir speisialta gach beart is gá a dhéanamh chun na cuspóirí réitigh a chur chun cinn agus beidh dualgas air gníomhaíochtaí réitigh a rinne an t-údarás réitigh a chur chun feidhme. I gcás neamhréireachta nó coinbhleachta le haon dualgas bainistíochta eile atá leagtha síos i reachtanna an ghnóthais nó sa dlí náisiúnta, beidh sáraíocht ag an dualgas reachtúil sin ar an dualgas eile sin.

4.   Ceanglóidh na Ballstáit go ndéanfaidh an bainisteoir speisialta tuarascálacha a tharraingt suas le haghaidh an údaráis réitigh a cheap é ní í ar eatraimh thráthrialta arna leagan amach ag an údarás réitigh agus ag tús agus deireadh théarma a shainordaithe nó a sainordaithe. Beidh tuairisc mhionsonraithe sna tuarascálacha sin ar riocht airgeadais an ghnóthais faoi réiteach agus sonrófar na cúiseanna a bheidh leis na bearta a dhéanfar.

5.   Ní cheapfar an bainisteoir speisialta ar feadh tréimhse níos faide ná bliain amháin. Féadfar an tréimhse sin a athnuachan má chinneann an t-údarás réitigh go bhfuil na coinníollacha chun bainisteoir speisialta a cheapadh fós á gcomhlíonadh.

6.   Féadfaidh an t-údarás réitigh an bainisteoir speisialta a chur as oifig am ar bith.