Artikolu 71 Kulleġġi ta' riżoluzzjoni Ewropej

1.   Fejn impriża tal-assigurazzjoni jew tar-riassigurazzjoni ta' pajjiż terz jew impriża prinċipali ta' pajjiż terz ikollha impriżi sussidjarji fl-Unjoni stabbiliti f'żewġ Stati Membri jew aktar, jew ikollha żewġ fergħat jew aktar fl-Unjoni ta' impriża ta' pajjiż terz li jkunu meqjusa bħala sinifikanti minn żewġ Stati Membri jew aktar, l-awtoritajiet ta' riżoluzzjoni tal-Istati Membri fejn dawk l-impriżi sussidjarji fl-Unjoni jkunu stabbiliti jew fejn ikunu jinsabu dawk il-fergħat fl-Unjoni ta' impriża ta' pajjiż terz jistgħu jistabbilixxu kulleġġ ta' riżoluzzjoni Ewropew.

2.   Il-kulleġġ ta' riżoluzzjoni Ewropew għandu jwettaq il-funzjonijiet u l-kompiti speċifikati fl-Artikolu 70 fir-rigward tal-impriżi sussidjarji tal-Unjoni u, sa fejn dawk il-kompiti jkunu rilevanti, fir-rigward tal-fergħat tal-Unjoni ta' impriża ta' pajjiż terz imsemmija fil-paragrafu 1 ta' dan l-Artikolu u għandu b'xi mod ieħor jiffunzjona f'konformità mar-regoli stabbiliti fl-Artikolu 70.

3.   Meta impriża prinċipali waħda biss stabbilita fi Stat Membru jkollha l-impriżi sussidjarji kollha tal-Unjoni ta' impriża tal-assigurazzjoni jew tar-riassigurazzjoni ta' pajjiż terz jew impriża prinċipali ta' pajjiż terz, il-kulleġġ ta' riżoluzzjoni Ewropew għandu jkun ippresedut mill-awtorità ta' riżoluzzjoni tal-Istat Membru fejn tkun stabbilita dik l-impriża prinċipali.

Fejn l-ewwel subparagrafu ma japplikax, l-awtorità ta' riżoluzzjoni tal-Istat Membru fejn impriża sussidjarja tal-Unjoni bl-ogħla valur ta' assi fuq il-karta tal-bilanċ totali hija stabbilita għandha tippresiedi l-kulleġġ ta' riżoluzzjoni Ewropew.