Artikolu 13 11.

Mat-tlestija tal-azzjonijiet tagħha, meħuda biex teżerċita s-setgħat tagħha skont il-paragrafu 5 sa 8, l-Aġenzija għandha tfassal rapport tal-investigazzjoni li jippreżenta s-sejbiet tal-Aġenzija. Ir-rapport ta’ investigazzjoni għandu jinkludi wkoll l-evidenza kollha li fuqha ġew ibbażati s-sejbiet. Jekk fir-rapport ta’ investigazzjoni l-Aġenzija tqis li kien hemm ksur ta’ dan ir-Regolament, hija għandha tinforma lill-awtoritajiet regolatorji nazzjonali tal-Istati Membri kkonċernati kif xieraq u teżiġi li dawn jieħdu l-miżuri meħtieġa, inkluż kif xieraq f’konformità mal-Artikolu 18. Fir-rapport ta’ investigazzjoni l-Aġenzija tista’ wkoll tirrakkomanda ċerti miżuri ta’ segwitu lill-awtoritajiet regolatorji nazzjonali rilevanti u, meta jkun meħtieġ, għandha tinforma lill-Kummissjoni. Fi żmien tliet xhur minn meta jirċievu r-rapport ta’ investigazzjoni, l-awtoritajiet regolatorji nazzjonali rilevanti għandhom jikkomunikaw lill-Aġenzija u, fejn meħtieġ lill-Kummissjoni, il-miżuri li huma jqisu meħtieġa li jieħdu.