Artikolu 16 L-organizzazzjoni u l-prinċipji ewlenin tal-proċedura għall-ħruġ tal-permessi

Il- proċedura għall-ħruġ tal-permessi għandha tkopri l-permessi amministrattivi rilevanti kollha biex jinbnew, jiġu repowered, u jitħaddmu l-impjanti tal-enerġija rinnovabbli, inklużi dawk li jikkombinaw sorsi differenti ta’ enerġija rinnovabbli, pompi tas-sħana, u ħażna tal-enerġija kolokalizzat, inklużi l-faċilitajiet tal-enerġija u termiċi, kif ukoll l-assi meħtieġa għall-konnessjoni ta’ tali mpjanti, pompi tas-sħana u ħażna mal-grilja, għall-integrazzjoni tal-enerġija rinnovabbli fin-networks tat-tisħin u t-tkessiħ inklużi permessi għall-konnessjoni mal-grilja u, fejn meħtieġ, valutazzjonijiet ambjentali. Il-proċedura għall-ħruġ tal-permessi għandha tinkludi l-istadji amministrattivi kollha mir-rikonoxximent tal-kompletezza tal-applikazzjoni għall-permess skont il-paragrafu 2 għan-notifika tad-deċiżjoni finali dwar l-eżitu tal-proċedura għall-ħruġ tal-permessi mill-awtorità jew l-awtoritajiet kompetenti rilevanti.

Fi żmien 30 jum, għall-impjanti tal-enerġija rinnovabbli li jinsabu f’żoni ta’ aċċelerazzjoni tal-enerġija rinnovabbli, u fi żmien 45 jum għall-impjanti tal-enerġija rinnovabbli li jinsabu barra miż-żoni ta’ aċċelerazzjoni għall-enerġija rinnovabbli, minn meta tirċievi applikazzjoni għal permess, l-awtorità kompetenti għandha tirrikonoxxi l-kompletezza tal-applikazzjoni jew, jekk l-applikant ma jkunx bagħat l-informazzjoni kollha meħtieġa biex tiġi pproċessata l-applikazzjoni, titlob li l-applikant jippreżenta applikazzjoni kompluta mingħajr dewmien bla bżonn. Id-data ta’ rikonoxximent tal-kompletezza tal-applikazzjoni mill-awtorità kompetenti għandha sservi bħala l-bidu tal-proċedura għall-ħruġ tal-permessi.

L-Istati Membri għandhom jistabbilixxu jew jiddeżinjaw punt ta’ kuntatt wieħed jew aktar. Dawk il-punti ta’ kuntatt għandhom, fuq talba tal-applikant, jiggwidaw u jiffaċilitaw l-applikant matul il-proċedura amministrattiv tal-applikazzjoni għall-permess u għall-ħruġ tal-permessi kollha. L-applikant ma għandux jintalab jikkuntattja aktar minn punt ta’ kuntatt wieħed matul il-proċedura kollha. Il-punt ta’ kuntatt għandu jiggwida lill-applikant tul il-proċedura amministrattiva tal-applikazzjoni għall-permess, inkluż il-passi relatati mal-protezzjoni tal-ambjent, b’mod trasparenti sal-ħruġ ta’ deċiżjoni waħda jew aktar mill-awtoritajiet kompetenti fi tmiem il-proċedura għall-ħruġ tal-permessi, jipprovdi l-informazzjoni meħtieġa kollha lill-applikant u, meta jkun xieraq, jinvolvi lil awtoritajiet amministrattivi oħra. Il-punt ta’ kuntatt għandu jiżgura li l-iskadenzi għall-proċeduri għall-ħruġ tal-permessi stabbiliti f’din id-Direttiva huma sodisfatti. L-applikanti għandhom ikunu jistgħu jissottomettu d-dokumenti rilevanti f’format diġitali. Sal-21 ta’ Novembru 2025, l-Istati Membri għandhom jiżguraw li l-proċeduri għall-ħruġ tal-permessi kollha jsiru b’forma elettronika.

Il-punt ta’ kuntatt għandu jipprovdi manwal tal-proċeduri għall-iżviluppaturi tal-impjanti tal-enerġija rinnovabbli, u dik l-informazzjoni għandu jipprovdiha online, filwaqt li jindirizza b’mod li jiddistinwgi bejn il-proġetti tal-enerġija rinnovabbli fuq skala żgħira, il-proġetti ta’ awtokonsumaturi ta’ sorsi rinnovabbli u l-komunitajiet tal-enerġija rinnovabbli. L-informazzjoni online għandha tindika l-punt ta’ kuntatt rilevanti għall-applikazzjoni in kwistjoni. Jekk Stat Membru jkollu aktar minn punt ta’ kuntatt wieħed, l-informazzjoni online għandha tindika l-punt ta’ kuntatt rilevanti għall-applikazzjoni in kwistjoni.

L-Istati Membri għandhom jiżguraw li l-applikanti u l-pubbliku ġenerali jkollhom aċċess faċli għal proċeduri sempliċi għas-soluzzjoni għat-tilwim rigward il-proċedura għall-għoti tal-permessi u għall-ħruġ tal-permessi biex jinbnew u jitħaddmu l-impjanti tal-enerġija rinnovabbli, inkluż meta applikabbli, mekkaniżmi alternattiv għas-soluzzjoni għat-tilwim.

L-Istati Membri għandhom jiżguraw li l-appelli amministrattivi u ġudizzjarji fil-kuntest ta’ proġett għall-iżvilupp ta’ impjant tal-enerġija rinnovabbli, il-konnessjoni ta’ dak l-impjant mal-grilja u l-assi meħtieġa għall-iżvilupp tan-networks tal-infrastruttura tal-enerġija meħtieġa għall-integrazzjoni ta’ enerġija minn sorsi rinnovabbli fis-sistema tal-enerġija, inklużi l-appelli relatati ma’ aspetti ambjentali, huma soġġetti għall-aktar proċedura amministrattiva u ġudizzjarja rapida disponibbli fil-livell nazzjonali, reġjonali u lokali rilevanti.

L-Istati Membri għandhom jipprovdu riżorsi adegwati biex jiżguraw persunal kwalifikat, titjib tal-ħiliet u taħriġ mill-ġdid tal-awtoritajiet kompetenti tagħhom f’konformità mal-kapaċità ta’ ġenerazzjoni tal-enerġija rinnovabbli installata ppjanata prevista fil-pjanijiet nazzjonali integrati tagħhom dwar l-enerġija u l-klima ppreżentati skont l-Artikoli 3 u 14 tar-Regolament (UE) 2018/1999. L-Istati Membri għandhom jassistu lill-awtoritajiet reġjonali u lokali sabiex jiffaċilitaw il-proċedura għall-ħruġ tal-permessi.

Għajr meta jikkoinċidi ma’ stadji amministrattivi oħra tal-proċedura għall-ħruġ tal-permessi, il-perjodu ta’ żmien tal-proċedura għall-ħruġ tal-permessi ma għandux jinkludi:

Id-deċiżjonijiet kollha li jirriżultaw mill-proċeduri għall-ħruġ tal-permessi msemmija għandhom ikunu disponibbli għall-pubbliku skont il-liġi applikabbli.