Artikolu 16b Il-proċedura għall-ħruġ tal-permessi barra miż-żoni ta’ aċċelerazzjoni għall-enerġija rinnovabbli

L-Istati Membri għandhom jiżguraw li l-proċedura għall-ħruġ tal-permessi msemmi fl-Artikolu 16(1) ma għandux jaqbeż is-sentejn għall-proġetti tal-enerġija rinnovabbli li jinsabu barra miż-żoni ta’ aċċelerazzjoni għall-enerġija rinnovabbli. Madankolly, fil-każ ta’ proġetti tal-enerġija rinnovabbli lil hinn mill-kosta, il-proċedura għall-ħruġ tal-permessi ma għandhiex taqbeż it-tliet snin. Meta debitament ġustifikat abbażi ta’ ċirkostanzi straordinarji, inkluż meta dawn jeħtieġu perjodi estiżi meħtieġa għal valutazzjonijiet skont il-liġi ambjentali applikabbli tal-Unjoni, l-Istati Memrbi jistgħu jestendu wieħed minn dawk il-perjodi b’mhux aktar minn sitt xhur. L-Istati Membri għandhom jinfurmaw lill-iżviluppatur b’mod ċar biċ-ċirkostanzi straordinarji li jiġġustifikaw tali estensjoni.

Meta tkun meħtieġa valutazzjoni ambjentali skont id-Direttivi 2011/92/UE jew 92/43/KEE, din għandha ssir bi proċedura waħda li tgħaqqad il-valutazzjonijiet rilevanti kollha għal proġett tal-enerġija rinnovabbli partikolari. Meta tkun meħtieġa tali valutazzjoni tal-impatt ambjentali, l-awtorità kompetenti, filwaqt li tqis l-informazzjoni li pprovda l-iżviluppatur tal-proġett, għandha toħroġ opinjoni dwar il-kamp ta’ applikazzjoni u l-livell ta’ dettall tal-informazzjoni li l-iżviluppatur tal-proġett għandu jinkludi fir-rapport tal-valutazzjoni tal-impatt ambjentali, li l-kamp ta’ applikazzjoni tagħha ma għandux jiġi estiż sussegwentement. Meta l-proġett tal-enerġija rinnovabbli speċifiċi jkun adotta miżuri meħtieġa ta’ mitigazzjoni, kwalunkwe qtil jew tfixkil tal-ispeċijiet protetti skont l-Artikolu 12(1) tad-Direttiva 92/43/KEE u l-Artikolu 5 tad-Direttiva 2009/147/KE ma għandux jitqies li jkun intenzjonat. Meta l-miżuri ġodda ta’ mitigazzjoni li jipprevjenu kemm jista’ jkun il-qtil jew it-tfixkil tal-ispeċijiet protetti skont id-Direttivi 92/43/KEE u 2009/147/KE, jew kwalunkwe impatt ambjentali ieħor, ma jkunux ġew ittestjati b’mod wiesa’ fir-rigward tal-effettività tagħhom, l-Istati Membri jistgħu jippermettu l-użu tagħhom għal proġett pilota wieħed jew aktar għal perjodu ta’ żmien limitat, dment li l-effettività ta’ tali miżuri ta’ mitigazzjoni tiġi mmonitorjata mill-qrib u jittieħdu l-passi xierqa minnufih jekk ma jurux li huma effettivi.