Artikolu 18 Informazzjoni u taħriġ

L-Istati Membri għandhom jistabbilixxu qafas biex jiżguraw li jkollhom għadd suffiċjenti ta’ installaturi mħarrġa u kwalifikati tat-teknoloġija msemmija fl-ewwel subparagrafu biex imantnu t-tkabbir tal-enerġija rinnovabbli meħtieġa biex jintlaħqu l-miri differenti stabbiliti f’din id-Direttiva.

Sabiex jinkiseb għadd suffiċjenti ta’ installaturi u disinjaturi, l-Istati Membri għandhom jiżguraw li jkun hemm disponibbli programmi ta’ taħriġ suffiċjenti li jwasslu għal ċertifikazzjoni jew għal kwalifika u li jkopru t-teknoloġija tat-tisħin u t-tkessiħ rinnovabbli, sistemi fotovoltajċi solari, inkluż il-ħżin tal-enerġija, punti tal-irriċarġjar li jippermettu rispons tad-domanda, u l-aħħar soluzzjonijiet innovattivi tagħhom, sakemm ikunu kompatibbli mal-iskemi ta’ ċertifikazzjoni tagħhom jew skemi ta’ kwalifiki ekwivalenti. L-Istati Membri għandhom jistabbilixxu miżuri biex jippromwovu l-parteċipazzjoni f’tali programmi ta’ taħriġ, b’mod partikolari minn intrapriżi żgħar u ta’ daqs medju u dawk li jaħdmu għal rashom. L-Istati Membri jistgħu jistabbilixxu ftehimiet volontarji mal-fornituri u mal-bejjiegħa tat-teknoloġija rilevanti biex iħarrġu għadd suffiċjenti ta’ installaturi, li jistgħu jkunu bbażati fuq stimi tal-bejgħ, fl-aktar soluzzjonijiet u teknoloġija innovattivi riċenti disponibbli fis-suq.

Jekk l-Istati Membri jidentifikaw distakk sostanzjali bejn l-għadd disponibbli u dak meħtieġ ta’ installaturi mħarrġa u kwalifikati, huma għandhom jieħdu miżuri biex jindirizzaw dak id-distakk.