Artikolu 1 Is-suġġett u l-kamp ta’ applikazzjoni

1.   Dan ir-Regolament jipprevedi approċċ komuni biex jiżgura li l-utenti tan-networks pubbliċi tal-komunikazzjoni mobbli, meta jkunu qegħdin jivvjaġġaw fl-Unjoni, ma jħallsux prezzijiet eċċessivi għas-servizzi roaming madwar l-Unjoni meta mqabbla mal-prezzijiet nazzjonali kompetittivi, meta jagħmlu u jirċievu telefonati, meta jibagħtu u jirċievu messaġġi SMS u meta jużaw servizzi ta’ pakkett ta’ komunikazzjoni ta’ data trażmessa.

Dan ir-Regolament b’hekk jikkontribwixxi għall-funzjonament bla xkiel tas-suq intern filwaqt li jikseb livell għoli ta’ protezzjoni tal-konsumaturi, protezzjoni tad-data, privatezza u fiduċja, irawwam il-kompetizzjoni, l-indipendenza u t-trasparenza fis-suq u joffri inċentivi għall-innovazzjoni, l-għażla lill-konsumaturi u l-integrazzjoni ta’ persuni b’diżabbiltà, filwaqt li jikkonforma bis-sħiħ mal-Karta tad-Drittijiet Fundamentali tal-Unjoni Ewropea.

Dan ir-Regolament jistabbilixxi l-kundizzjonijiet tal-aċċess bl-ingrossa għal networks pubbliċi tal-komunikazzjoni mobbli għall-finijiet ta’ forniment ta’ servizzi tar-roaming regolati. Japplika kemm għat-tariffi mitluba mill-operaturi tan-networks fil-livell bl-ingrossa u anki għat-tariffi mitluba mill-fornituri tar-roaming fil-livell bl-imnut.

2.   Dan ir-Regolament jistabbilixxi wkoll regoli mmirati biex tiżdied it-trasparenza u jitjieb l-għoti tal-informazzjoni dwar it-tariffi lill-utenti tas-servizzi tar-roaming, inklużi l-utenti ta’ servizzi tar-roaming mhux regolati f’pajjiżi terzi. Huwa jżid ukoll it-trasparenza għall-utenti ta’ servizzi tar-roaming mhux regolati meta dawn jikkonnettjaw ma’ network pubbliku ta’ komunikazzjoni mobbli mhux terrestri, bħal abbord bastimenti jew inġenji tal-ajru, fejn applikabbli.

3.   It-tariffi massimi stabbiliti f’dan ir-Regolament huma espressi bl-ewro.

4.   Meta t-tariffi massimi skont l-Artikoli 8 sa 11 huma denominati b’muniti għajr l-ewro, il-valuri jridu jiġu ddeterminati billi tiġi applikata l-medja tar-rati tal-kambju ta’ referenza ppubblikati fil-15 ta’ Jannar, fil-15 ta’ Frar u fil-15 ta’ Marzu tas-sena kalendarja rilevanti mill-Bank Ċentrali Ewropew f’Il-Ġurnal Uffiċjali tal-Unjoni Ewropea. Għat-tariffi massimi, il-limiti f’muniti għajr l-ewro għandhom jiġu riveduti kull sena mill-2023. Il-limiti riveduti kull sena f’dawk il-muniti għandhom japplikaw mill-15 ta’ Mejju.

5.   Dan ir-Regolament huwa mingħajr preġudizzju għall-assenjazzjoni ta’ kompiti lill-awtoritajiet regolatorji nazzjonali u awtoritajiet kompetenti oħra skont id-Direttiva (UE) 2018/1972, inklużi r-responsabbiltajiet għall-implimentazzjoni tal-Parti III, Titolu III ta’ dik id-Direttiva.