Airteagal 1 Ábhar agus raon feidhme

1.   Leis an Rialachán seo, foráiltear do chur chuige comhchoiteann chun a áirithiú nach ndéanann úsáideoirí líonraí poiblí cumarsáide soghluaiste, agus iad ag taisteal laistigh den Aontas, praghsanna iomarcacha a íoc, i gcomparáid le praghsanna náisiúnta iomaíocha, as seirbhísí fánaíochta uile-Aontais le linn dóibh glaonna a dhéanamh agus a fháil, le linn dóibh teachtaireachtaí SMS a sheoladh agus a fháil agus le linn dóibh seirbhísí cumarsáide sonraí paicéadlasctha a úsáid.

Ar an gcaoi sin, leis an Rialachán seo, rannchuidítear le feidhmiú rianúil an mhargaidh inmheánaigh agus, ag an am céanna, déantar ardleibhéal cosanta do thomhaltóirí, cosanta sonraí, príobháideachais agus iontaoibhe a bhaint amach, cothaítear iomaíocht, neamhspleáchas agus trédhearcacht sa mhargadh agus tairgtear dreasachtaí maidir le nuálaíocht, rogha do thomhaltóirí agus lánpháirtiú daoine faoi mhíchumas, agus, ag an am céanna, comhlíontar Cairt um Chearta Bunúsacha an Aontais Eorpaigh ina hiomláine.

Leis an Rialachán seo, leagtar amach na coinníollacha maidir le rochtain mhórdhíola ar líonraí poiblí cumarsáide soghluaiste chun seirbhísí fánaíochta rialáilte a sholáthar. Tá feidhm aige maidir leis na muirir a thoibhíonn oibreoirí líonraí ar an leibhéal mórdhíola agus maidir leis na muirir a thoibhíonn soláthraithe seirbhísí fánaíochta ar an leibhéal miondíola.

2.   Leis an Rialachán seo, leagtar síos freisin rialacha arb é is aidhm dóibh trédhearcacht a mhéadú agus feabhas a chur ar sholáthar na faisnéise faoi mhuirir d’úsáideoirí seirbhísí fánaíochta, lena n-áirítear úsáideoirí seirbhísí fánaíochta neamhrialáilte i dtríú tíortha. Chomh maith leis sin, is mó trédhearcacht atá ann, a bhuí leis, d’úsáideoirí seirbhísí fánaíochta neamhrialáilte agus iad ag nascadh le líonra neamh-thrastíre poiblí cumarsáide soghluaiste, amhail ar bord soithí nó aerárthaí, i gcás inarb infheidhme.

3.   Is i dtéarmaí euro a dhéantar na muirir uasta a leagtar amach sa Rialachán seo a shloinneadh.

4.   I gcás ina ndéantar na muirir uasta faoi Airteagail 8 go 11 a ainmniú in airgeadraí seachas an euro, déanfar na luachanna a chinneadh sna hairgeadraí sin trí mheán na rátaí malairte tagartha a fhoilsíonn an Banc Ceannais Eorpach an 15 Eanáir, an 15 Feabhra agus an 15 Márta sa bhliain féilire ábhartha in Iris Oifigiúil an Aontais Eorpaigh a chur i bhfeidhm. I gcás na muirear uasta, déanfar na teorainneacha in airgeadraí seachas an euro a athbhreithniú ar bhonn bliantúil amhail ó 2023. Beidh feidhm ag na teorainneacha arna n-athbhreithniú go bliantúil sna hairgeadraí sin ón 15 Bealtaine.

5.   Ní dochar an Rialachán seo do shannadh cúraimí d’údaráis rialála náisiúnta agus d’údaráis inniúla eile faoi Threoir (AE) 2018/1972, lena n-áirítear na freagrachtaí as Cuid III, de Theideal III, den Treoir sin a chur chun feidhme.