Artikolu 10 Tariffi bl-ingrossa għall-messaġġi SMS tar-roaming regolati

1.   It-tariffa bl-ingrossa medja li l-operatur tan-network miżjur jista’ jimponi fuq il-fornitur tar-roaming għall-forniment ta’ messaġġ SMS tar-roaming regolat li joriġina min-network miżjur, ma għandhiex tkun aktar minn limitu ta’ salvagwardja ta’ EUR 0,004 għal kull messaġġ SMS. Dik it-tariffa massima bl-ingrossa għandha tonqos għal EUR 0,003 għal kull messaġġ SMS fl-1 ta’ Jannar 2025, u għandha tkun mingħajr preġudizzju għall-Artikolu 21, u tibqa’ EUR 0,003 sat-30 ta’ Ġunju 2032.

2.   It-tariffa bl-ingrossa medja msemmija fil-paragrafu 1 għandha tapplika bejn kwalunkwe żewġ operaturi u għandha tiġi kkalkulata fuq perjodu ta’ 12-il xahar jew kwalunkwe perjodu iqsar li jkun fadal qabel tmiem il-perjodu tal-applikazzjoni ta’ tariffa bl-ingrossa medja massima, kif previst fil-paragrafu 1 jew qabel it-30 ta’ Ġunju 2032.

3.   It-tariffa bl-ingrossa medja msemmija fil-paragrafu 1 għandha tiġi kkalkulata billi d-dħul totali bl-ingrossa riċevut mill-operatur tan-network miżjur jew mill-operatur tan-network tal-pajjiż tal-oriġini għall-oriġini u t-trażmissjoni ta’ messaġġi SMS tar-roaming regolati fl-Unjoni tul il-perjodu rilevanti jiġi diviż bl-għadd totali ta’ messaġġi SMS bħal dawk li joriġinaw u jiġu trażmessi f’isem il-fornitur tar-roaming rilevanti jew l-operatur tan-network tal-pajjiż tal-oriġini tul dak il-perjodu.

4.   L-operatur tan-network miżjur ma għandu jimponi l-ebda tariffa fuq il-fornitur tar-roaming jew l-operatur tan-network tal-pajjiż tal-oriġini ta’ klijent tar-roaming, b’mod separat mit-tariffa msemmija fil-paragrafu 1, għat-terminazzjoni ta’ messaġġ SMS tar-roaming regolat mibgħut lil klijent tar-roaming waqt roaming fuq in-network miżjur tiegħu.