Artikolu 5 L-użu ta’ Fjuwils Rinnovabbli ta’ Oriġini Mhux Bijoloġika

1.   Għall-kalkolu tal-intensità tal-gassijiet serra tal-enerġija użata abbord minn bastiment, mill-1 ta’ Jannar 2025 sal-31 ta’ Diċembru 2033 jista’ jintuża multiplikatur ta’ “2” biex il-bastiment jiġi ppremjat għall-użu ta’ RFNBO. Il-metodoloġija għal dan il-kalkolu hija stipulata fl-Anness I.

2.   Il-Kummissjoni għandha timmonitorja, tikkalkula u kull sena tippubblika, abbażi tad-data rreġistrata fil-bażi tad-data FuelEU msemmija fl-Artikolu 19 u sa mhux aktar tard minn 18-il xahar wara t-tmiem ta’ kull perjodu ta’ rappurtar, is-sehem ta’ RFNBO fl-enerġija annwali użata abbord mill-bastimenti li jaqgħu fil-kamp ta’ applikazzjoni ta’ dan ir-Regolament.

3.   Jekk is-sehem ta’ RFNBO msemmi fil-paragrafu 2 ikun inqas minn 1 % għall-perjodu ta’ rappurtar 2031, għandha tapplika submira ta’ 2 % għal dawn il-karburanti fl-enerġija annwali użata abbord minn bastiment mill-1 ta’ Jannar 2034, soġġett għall-paragrafu 5.

4.   Il-paragrafu 3 ma għandux japplika meta r-riżultati tal-monitoraġġ previsti fil-paragrafu 2 li jkunu disponibbli qabel l-1 ta’ Jannar 2033 juru li s-sehem imsemmi fil-paragrafu 2 ikun ogħla minn 2 %.

5.   Jekk, abbażi tal-attivitajiet ta’ monitoraġġ imsemmija fil-paragrafu 2 u wara l-valutazzjoni tal-Kummissjoni, ikun hemm evidenza ta’ kapaċità ta’ produzzjoni u disponibbiltà insuffiċjenti ta’ RFNBO għas-settur marittimu, distribuzzjoni ġeografika mhux uniformi jew prezz għoli wisq għal dawk il-karburanti, is-submira prevista fil-paragrafu 3 ma għandhiex tapplika.

6.   Il-Kummissjoni għandha tadotta atti ta’ implimentazzjoni li jispeċifikaw il-kriterji għall-valutazzjoni previsti fil-paragrafu 5 u l-metodu biex jiġi kkalkolat il-fattur ta’ differenza fil-prezz bejn RFNBO u l-karburanti fossili użati fiċ-ċellola 14 tat-tabella fil-Parti B tal-Anness IV. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 29(3).

7.   Il-Kummissjoni għandha s-setgħa li tadotta atti delegati f’konformità mal-Artikolu 28 sabiex:

8.   Fejn tapplika s-submira msemmija fil-paragrafu 3 ta’ dan l-Artikolu, il-Kummissjoni għandha tadotta, sal-31 ta’ Diċembru 2033, atti ta’ implimentazzjoni biex tispeċifika aktar ir-regoli għall-applikazzjoni tal-paragrafu 3 ta’ dan l-Artikolu fir-rigward ta’:

Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 29(3).

9.   Is-submira msemmija fil-paragrafu 3 ta’ dan l-Artikolu, jekk applikabbli, ma għandhiex tapplika għal bastiment li juri li l-istess sehem tal-enerġija annwali użata abbord jintlaħaq minn karburanti oħra li jipprovdu ffrankar ekwivalenti tal-emissjonijiet ta’ gassijiet serra u li huma ċċertifikati skont l-Artikolu 10 ta’ dan ir-Regolament, eskluż il-bijokarburanti msemmija fil-Parti B tal-Anness IX għad-Direttiva (UE) 2018/2001.

10.   Dan l-Artikolu ma għandux japplika għas-sehem tal-enerġija annwali użata abbord mill-bastimenti mill-provvista tal-elettriku mix-xatt.