Artikolu 19 Bażi tad-data FuelEU u rappurtar

1.   Il-Kummissjoni għandha tiżviluppa, tiżgura l-funzjonament ta’ u taġġorna bażi tad-data elettronika għall-monitoraġġ tal-konformità ma’ dan ir-Regolament (il-“bażi tad-data FuelEU”). Il-bażi tad-data FuelEU għandha tintuża biex jinżamm rekord ta’ azzjonijiet relatati mal-attivitajiet ta’ verifika, tal-bilanċ ta’ konformità tal-bastimenti, inkluż l-użu tal-mekkaniżmi ta’ flessibbiltà stabbiliti fl-Artikoli 20 u 21, tal-applikazzjoni tal-eċċezzjonijiet imsemmija fl-Artikolu 6(5), ta’ azzjonijiet relatati mal-ħlas tal-penali FuelEU imposti skont l-Artikolu 23 u tal-ħruġ tad-dokument tal-konformità FuelEU. Hija għandha tkun aċċessibbli għall-kumpaniji, il-verifikaturi, l-awtoritajiet kompetenti u kwalunkwe entità debitament awtorizzata, il-korpi nazzjonali ta’ akkreditament, l-Aġenzija Ewropea għas-Sigurtà Marittima stabbilita bir-Regolament (KE) Nru 1406/2002 tal-Parlament Ewropew u tal-Kunsill (24) u l-Kummissjoni, bi drittijiet ta’ aċċess u funzjonalitajiet xierqa li jikkorrispondu għar-responsabbiltajiet rispettivi tagħhom fl-implimentazzjoni ta’ dan ir-Regolament.

2.   Kwalunkwe element reġistrat jew modifikat fil-bażi tad-data FuelEU għandu jiġi nnotifikat lill-entitajiet li għalihom ikun aċċessibbli.

3.   Il-Kummissjoni għandha tadotta atti ta’ implimentazzjoni li jistabbilixxu r-regoli għad-drittijiet ta’ aċċess u l-ispeċifikazzjonijiet funzjonali u tekniċi, inkluż regoli ta’ notifika u filtraġġ, tal-bażi tad-data FuelEU. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 29(3).