Artikolu 7 Reġim ta’ Valutazzjoni

1.   Il-livelli limitu ta’ valutazzjoni speċifikati fl-Anness II għandhom japplikaw għad-diossidu tal-kubrit, għad-diossidu tan-nitroġenu u għall-ossidi tan-nitroġenu, għall-materja partikolata (PM10 u PM2,5), għall-benżen, għall-monossidu tal-karbonju, għall-arseniku, għall-kadmju, għaċ-ċomb, għan-nikil, għall-benżo(a)piren u għall-ożonu fl-arja ambjentali.

Kull żona għandha tiġi kklassifikata fir-rigward ta’ dawk il-limiti massimi ta’ valutazzjoni.

2.   L-Istati Membri għandhom jagħmlu rieżami tal-klassifikazzjoni msemmija fil-paragrafu 1 mill-inqas kull ħames snin skont il-proċedura stabbilita fil-paragrafu 3. Madankollu, il-klassifikazzjonijiet għandhom ikunu rieżaminati iktar spiss fil-każ ta’ tibdil sinifikanti fl-attivitajiet li jħallu impatt fuq il-konċentrazzjonijiet tal-ambjent tad-diossidu tal-kubrit, id-diossidu tan-nitroġenu u l-ossidi tan-nitroġenu, il-partikoli (PM10, PM2,5), il-benżen, il-monossidu tal-karbonju, l-arseniku, il-kadmju, iċ-ċomb, in-nikil, il-benżo(a)piren jew l-ożonu.

3.   Il-qabżiet tal-livelli limitu ta’ valutazzjoni speċifikati fl-Anness II għandhom ikunu determinati abbażi tal-konċentrazzjonijiet matul il-ħames snin ta’ qabel meta jkun hemm data suffiċjenti disponibbli. Livell limitu ta’ valutazzjoni għandu jitqies li nqabeż jekk ikun inqabeż matul mill-inqas tliet snin separati minn dawk il-ħames snin ta’ qabel.

Fejn tkun disponibbli data għal inqas minn ħames snin, l-Istati Membri jistgħu jikkombinaw kampanji ta’ kejl ta’ żmien qasir matul il-perjodu tas-sena u f’postijiet li jkunu x’aktarx tipiċi tal-ogħla livelli ta’ sustanzi niġġiesa, b’informazzjoni tal-inventarji dwar l-emissjonijiet u riżultati miksuba mill-applikazzjonijiet ta’ mmudellar sabiex jiġu determinati il-qabżiet tal-livelli limitu ta’ valutazzjoni.