Artikolu 13 Valuri limitu, valuri fil-mira u obbligi għat-tnaqqis tal-esponiment medju

1.   L-Istati Membri għandhom jiżguraw li, fiż-żoni kollha tagħhom, il-livelli ta’ sustanzi niġġiesa fl-arja ambjentali ma’ jaqbżux il-valuri limitu rispettivi stabbiliti fit-Taqsima 1 tal-Anness I.

2.   L-Istati Membri għandhom jiżguraw, billi jieħdu l-miżuri kollha meħtieġa li ma jinvolvux kostijiet sproporzjonati, li l-livelli ta’ sustanzi niġġiesa fiż-żoni kollha tagħhom ma jaqbżux il-valuri fil-mira rispettivi, kif stipulat fit-Taqsimiet 1 u 2 tal-Anness I.

3.   L-Istati Membri għandhom jiżguraw li l-obbligi għat-tnaqqis tal-esponiment medju għal PM2,5 u NO2 stipulati fit-Taqsima 5, il-Punt B, tal-Anness I, jintlaħqu fl-unitajiet territorjali tal-esponiment medju tagħhom kollha, fejn jaqbżu l-għanijiet tal-konċentrazzjoni tal-esponiment medju stabbiliti fit-Taqsima 5, il-Punt C, tal-Anness I.

4.   Il-konformità mal-paragrafi 1, 2 u 3 ta’ dan l-Artikolu għandha tiġi vvalutata f’konformità mal-Anness IV.

5.   L-indikaturi tal-esponiment medju għandhom jiġu vvalutati f’konformità mat-Taqsima 5, il-Punt A, tal-Anness I.

6.   L-iskadenza biex jintlaħqu l-valuri limitu stabbiliti fit-Taqsima 1, it-Tabella 1, tal-Anness I tista’ tiġi posposta f’konformità mal-Artikolu 18.

7.   L-Istati Membri jistgħu jżommu jew jintroduċu miżuri protettivi aktar iebsa, inklużi standards tal-kwalità tal-arja aktar iebsa minn dawk imsemmija f’dan l-Artikolu, f’konformità mal-Artikolu 193 tat-TFUE. L-Istati Membri għandhom jinnotifikaw tali miżuri lill-Kummissjoni fi tliet xhur mill-adozzjoni tagħhom.