Artikolu 3 Definizzjonijiet

“materja prima” tfisser kwalunkwe sustanza li tnaqqas is-saff tal-ożonu li tgħaddi minn trasformazzjoni kimika fi proċess li fih tkun kompletament mibdula mill-kompożizzjoni oriġinali tagħha u li l-emissjonijiet tagħha ma jkunux sinifikanti;

“aġenti ta’ proċess” tfisser kwalunkwe sustanza li tnaqqas is-saff tal-ożonu użata bħala aġent kimiku ta’ proċess fl-applikazzjonijiet elenkati fl-Anness III;

“importazzjoni” tfisser id-dħul ta’ sustanzi, prodotti u tagħmir li jnaqqsu s-saff tal-ożonu fit-territorju doganali tal-Unjoni, sa fejn it-territorju huwa kopert minn ratifika tal-Protokoll ta’ Montreal tal-1987 dwar Sustanzi li Jnaqqsu s-Saff tal-Ożonu (il-“Protokoll”), u tinkludi l-ħażna temporanja u l-proċeduri doganali msemmijin fl-Artikoli 201 u 210 tar-Regolament (UE) Nru 952/2013;

“esportazzjoni” tfisser il-ħruġ ta’ sustanzi, prodotti u tagħmir li jnaqqsu s-saff tal-ożonu mit-territorju doganali tal-Unjoni, sa fejn it-territorju jkun kopert minn ratifika tal-Protokoll;

“tqegħid fis-suq” tfisser ir-rilaxx doganali għaċ-ċirkolazzjoni libera fl-Unjoni jew il-forniment jew it-tqegħid għad-dispożizzjoni ta’ persuna oħra fl-Unjoni, għall-ewwel darba, bi ħlas jew mingħajr ħlas, jew l-użu ta’ sustanzi prodotti, jew ta’ prodotti jew ta’ tagħmir manifatturati, għall-użu proprju;

“użu” tfisser, fir-rigward ta’ sustanzi li jnaqqsu s-saff tal-ożonu, l-utilizzazzjoni fil-produzzjoni, fil-manutenzjoni jew fis-servizzjar, inkluż il-mili mill-ġdid tal-prodotti u tat-tagħmir, jew f’attivitajiet u proċessi oħrajn imsemmijin f’dan ir-Regolament;

“produttur” tfisser kwalunkwe persuna fiżika jew ġuridika li tipproduċi sustanzi li jnaqqsu s-saff tal-ożonu fl-Unjoni;

“irkupru” tfisser il-ġbir u l-ħżin ta’ sustanzi li jnaqqsu s-saff tal-ożonu minn kontenituri, prodotti u tagħmir waqt il-manutenzjoni jew is-servizzjar jew qabel ir-rimi tal-kontenituri, prodotti jew tat-tagħmir;

“riċiklaġġ” tfisser l-użu mill-ġdid ta’ sustanza li tnaqqas is-saff tal-ożonu rkuprata wara proċess bażiku ta’ tindif, inklużi l-filtrazzjoni u t-tnixxif;

“reklamazzjoni” tfisser l-ipproċessar mill-ġdid ta’ sustanza rkuprata li tnaqqas is-saff tal-ożonu għall-prestazzjoni ekwivalenti ta’ sustanza verġni, filwaqt li jitqies l-użu intenzjonat tagħha, f’faċilitajiet ta’ reklamazzjoni awtorizzati li għandhom it-tagħmir u l-proċeduri xierqa fis-seħħ biex jippermettu r-reklamazzjoni ta’ tali sustanzi u li jistgħu jivvalutaw u jaffermaw il-livell tal-kwalità meħtieġa;

“impriża” tfisser kwalunkwe persuna fiżika jew ġuridika li twettaq attività msemmija f’dan ir-Regolament;

“kontenitur” tfisser reċipjent li hu ddisinjat primarjament għat-trasport jew għall-ħżin ta’ sustanzi li jnaqqsu s-saff tal-ożonu;

“prodotti u tagħmir” tfisser il-prodotti u t-tagħmir kollha, inklużi partijiet tagħhom, minbarra l-kontenituri, użati biex jiġu ttrasportati jew jinħażnu sustanzi li jnaqqsu s-saff tal-ożonu;

“sustanza verġni” tfisser sustanza li ma ntużatx preċedentement;

“dekummissjonar” tfisser it-tneħħija permanenti mit-tħaddim jew mill-użu ta’ prodott jew ta’ tagħmir, li jkun fih sustanzi li jnaqqsu s-saff tal-ożonu, inkluż it-tifi finali ta’ faċilità;

“qerda” tfisser il-proċess ta’ trasformazzjoni jew ta’ dekompożizzjoni, permanenti u kemm jista’ jkun kompletament, ta’ sustanza li tnaqqas is-saff tal-ożonu f’sustanza stabbli waħda jew aktar li ma jkunux sustanzi li jnaqqsu s-saff tal-ożonu;

“stabbiliment fl-Unjoni” tfisser, fir-rigward ta’ persuna fiżika, li dik il-persuna jkollha r-residenza abitwali tagħha fl-Unjoni u, fir-rigward ta’ persuna ġuridika, li dik il-persuna jkollha stabbiliment permanenti tan-negozju kif imsemmi fl-Artikolu 5, il-punt (32) tar-Regolament (UE) Nru 952/2013 fl-Unjoni;

“pannell tal-fowm” tfisser struttura magħmula minn saffi li jkun fihom fowm u materjal riġidu, bħall-injam jew il-metall, marbuta fuq naħa waħda jew fuq iż-żewġ naħat;

“bord laminat” tfisser bord tal-fowm li huwa miksi b’saff irqiq ta’ materjal mhux riġidu, bħall-plastik.