Artikolu 3 Definizzjonijiet

“installazzjoni” tfisser unità teknika stazzjonarja li fiha titwettaq attività waħda jew aktar minn dawk elenkati fl-Anness I, u kull attività oħra direttament assoċjata fl-istess sit li jkollha konnessjoni teknika mal-attivitajiet elenkati f’dak l-Anness u li jista’ jkollha effett fuq emissjonijiet u tniġġis;

“faċilità” tfisser installazzjoni waħda jew aktar, jew partijiet tagħha jew tagħhom, li jkunu fl-istess sit u li huma operati mill-istess persuna fiżika jew ġuridika;

“sit” tfisser il-post ġeografiku fejn tinsab l-installazzjoni u l-faċilità;

“il-pubbliku” tfisser il-pubbliku kif definit fl-Artikolu 3, il-punt (16) tad-Direttiva 2010/75/UE;

“rilaxx” tfisser kwalunkwe introduzzjoni ta’ inkwinant fl-ambjent bħala riżultat ta’ kwalunkwe attività tal-bniedem, kemm jekk deliberata jew aċċidentali, ta’ rutina jew mhux ta’ rutina, inkluż tixrid, emissjoni, ħruġ, injezzjoni, rimi jew ħatt, jew permezz ta’ sistemi ta’ dranaġġ mingħajr trattament finali tal-ilma mormi;

“inkwinant” tfisser sustanza jew grupp ta’ sustanzi li tista’ tkun/jista’ jkun ta’ periklu għall-ambjent u għas-saħħa tal-bniedem minħabba l-proprjetajiet tagħha/tiegħu u l-introduzzjoni tagħha/tiegħu fl-ambjent;

“sustanza” tfisser sustanza kif definita fl-Artikolu 3, il-punt (1) tad-Direttiva 2010/75/UE;

“operatur” tfisser operatur kif definit fl-Artikolu 3, il-punt (15) tad-Direttiva 2010/75/UE;

“trasferiment barra mis-sit” tfisser il-moviment, lill-hinn mill-fruntieri ta’ installazzjoni, ta’ skart destinat għall-operazzjonijiet ta’ rkupru jew rimi u ta’ inkwinanti f’ilma mormi destinat għat-trattament tal-ilma mormi;

“skart” tfisser skart kif definit fl-Artikolu 3, il-punt (1) tad-Direttiva 2008/98/KE;

“ilma mormi” tfisser ilma mormi li ġej minn sorsi urbani, domestiċi jew industrijali, kif definit fl-Artikolu 2, il-punti (1), (2) u (3) tad-Direttiva 91/271/KEE, rispettivament, u kwalunkwe ilma użat ieħor li huwa soġġett għar-regolamentazzjoni mil-liġi tal-Unjoni minħabba s-sustanzi jew oġġetti li fih;

“sorsi diffużi” tfisser il-ħafna sorsi iżgħar jew sparpaljati li minnhom jista’ jkun hemm rilaxx ta’ inkwinanti fl-arja, fl-ilma jew fl-art, li l-impatt ikkombinat tagħhom fuq dawk il-mezzi jista’ jkun sinifikanti, u li għalihom ma huwiex prattiku li jinġabru rapporti minn kull sors individwali;

“awtorità kompetenti” tfisser l-awtorità jew l-awtoritajiet nazzjonali, jew kwalunkwe korp kompetenti jew aktar, maħtura mill-Istati Membri;

“skart perikoluż” tfisser skart perikoluż kif definit fl-Artikolu 3, il-punt (2) tad-Direttiva 2008/98/KE;

“operazzjoni ta’ rkupru” tfisser kwalunkwe operazzjoni msemmija fl-Anness II tad-Direttiva 2008/98/KE;

“operazzjoni ta’ rimi” tfisser kwalunkwe operazzjoni msemmija fl-Anness I tad-Direttiva 2008/98/KE;

“sena tar-rapportar” tfisser is-sena kalendarja li għaliha trid tinġabar id-data;

“akkwakultura” tfisser akkwakultura kif definit fl-Artikolu 4, il-punt (25) tar-Regolament (UE) Nru 1380/2013 tal-Parlament Ewrope u tal-Kunsill (26);