Artikolu 14 L-istabbiliment tar-Riżerva tal-UE għaċ-Ċibersigurtà

Riżerva tal-UE għaċ-Ċibersigurtà hija stabbilita biex tgħin, fuq talba, lill-utenti msemmija fil-paragrafu 3, jirrispondu jew ifornu appoġġ għar-rispons għall-inċidenti taċ-ċibersigurtà sinifikanti, inċidenti taċ-ċibersigurtà fuq skala kbira u inċidenti taċ-ċibersigurtà fuq skala ekwivalenti għal skala kbira, u jibdew l-irkupru minn tali inċidenti.

Ir-Riżerva tal-UE għaċ-Ċibersigurtà għandha tikkonsisti f’servizzi tar-rispons minn fornituri fdati ta’ servizzi tas-sigurtà ġestiti magħżula f’konformità mal-kriterji stabbiliti fl-Artikolu 17(2). Ir-Riżerva tista’ tinkludi servizzi impenjati minn qabel. Is-servizzi impenjati minn qabel ta’ fornitur fdat ta’ servizzi tas-sigurtà ġestiti għandhom ikunu konvertibbli f’servizzi tat-tħejjija relatati mal-prevenzjoni tal-inċidenti u r-rispons għall-inċidenti, fejn dawk is-servizzi impenjati minn qabel ma jintużawx biex jingħata rispons għall-inċidenti matul il-perjodu li fih is-servizzi huma impenjati minn qabel. Ir-Riżerva tal-UE għaċ-Ċibersigurtà għandha tkun utilizzabbli, fuq talba, fl-Istati Membri kollha, fl-istituzzjonijiet, fil-korpi, fl-uffiċċji u fl-aġenziji tal-Unjoni, u fil-pajjiżi terzi assoċjati mad-DEP kif imsemmi fl-Artikolu 19(1).

L-utenti tas-servizzi mir-Riżerva tal-UE għaċ-Ċibersigurtà għandhom ikunu dawn li ġejjin:

Il-Kummissjoni għandu jkollha responsabbiltà ġenerali għall-implimentazzjoni tar-Riżerva tal-UE għaċ-Ċibersigurtà. Il-Kummissjoni għandha tiddetermina l-prijoritajiet u l-evoluzzjoni tar-Riżerva tal-UE għaċ-Ċibersigurtà f’koordinazzjoni mal-Grupp ta’ Kooperazzjoni tal-NIS u, f’konformità mar-rekwiżiti tal-utenti msemmija fil-paragrafu 3, għandha tissorvelja l-implimentazzjoni tagħha, u għandha tiżgura l-komplementarjetà, il-konsistenza, is-sinerġiji u r-rabtiet ma’ azzjonijiet oħra ta’ appoġġ skont dan ir-Regolament kif ukoll ma’ azzjonijiet u programmi oħra tal-Unjoni. Dawk il-prijoritajiet għandhom jiġu rieżaminati u, jekk ikun xieraq, riveduti kull sentejn. Il-Kummissjoni għandha tinforma lill-Parlament Ewropew u lill-Kunsill b’dawk il-prijoritajiet u bi kwalunkwe reviżjonijiet tagħhom.

Mingħajr preġudizzju għar-responsabbiltà ġenerali tal-Kummissjoni għall-implimentazzjoni tar-Riżerva tal-UE għaċ-Ċibersigurtà msemmija fil-paragrafu 4 ta’ dan l-Artikolu u soġġetta għal ftehim ta’ kontribuzzjoni kif definit fl-Artikolu 2, il-punt (19), tar-Regolament (UE, Euratom) 2024/2509, il-Kummissjoni għandha tinkariga, b’mod totali jew parzjali, lill-ENISA bil-funzjonament u bl-amministrazzjoni tar-Riżerva tal-UE għaċ-Ċibersigurtà. L-aspetti li tagħhom ma tkunx inkarigata l-ENISA għandhom jibqgħu soġġetti għall-ġestjoni diretta tal-Kummissjoni.

L-ENISA għandha tħejji, mill-anqas kull sentejn, immappjar tas-servizzi meħtieġa mill-utenti msemmija fil-paragrafu 3, il-punti (a) u (b), ta’ dan l-Artikolu. L-immappjar għandu jinkludi wkoll id-disponibbiltà ta’ tali servizzi, anki minn entitajiet ġuridiċi stabbiliti jew meqjusa li huma stabbiliti fl-Istati Membri u kkontrollati mill-Istati Membri jew minn ċittadini tal-Istati Membri. Fl-immappjar ta’ dik id-disponibbiltà, l-ENISA għandha tivvaluta l-ħiliet u l-kapaċità tal-forza tax-xogħol tal-Unjoni fil-qasam taċ-ċibersigurtà rilevanti għall-objettivi tar-Riżerva tal-UE għaċ-Ċibersigurtà. Fit-tħejjija tal-immappjar, l-ENISA għandha tikkonsulta lill-Grupp ta’ Kooperazzjoni tal-NIS, lill-EU-CyCLONe, lill-Kummissjoni u, jekk applikabbli, lill-Bord Interistituzzjonali taċ-Ċibersigurtà stabbilit skont l-Artikolu 10 tar-Regolament (UE, Euratom) 2023/2841 (IICB). Fl-immappjar tad-disponibbiltà tas-servizzi, l-ENISA għandha tikkonsulta wkoll lill-partijiet interessati rilevanti fil-qasam taċ-ċibersigurtà, inklużi l-fornituri ta’ servizzi tas-sigurtà ġestiti. L-ENISA għandha tħejji mmappjar simili, wara li tinforma lill-Kunsill u wara li tikkonsulta lill-EU-CyCLONe, lill-Kummissjoni u, meta rilevanti, lir-Rappreżentant Għoli, biex tidentifika l-bżonnijiet tal-utenti msemmija fil-paragrafu 3, il-punt (c), ta’ dan l-Artikolu.

Il-Kummissjoni għandha s-setgħa li tadotta atti delegati skont l-Artikolu 23 biex tissupplimenta dan ir-Regolament billi tispeċifika t-tipi u l-għadd ta’ servizzi tar-rispons meħtieġa għar-Riżerva tal-UE għaċ-Ċibersigurtà. Fit-tħejjija ta’ dawk l-atti delegati, il-Kummissjoni għandha tqis l-immappjar imsemmi fil-paragrafu 6 ta’ dan l-Artikolu u tista’ tiskambja l-pariri u tikkoopera mal-Grupp ta’ Kooperazzjoni tal-NIS u mal-ENISA.