Artikolu 13 Tikkettar tar-reċipjenti tal-iskart għall-ġbir tal-iskart mill-imballaġġ

1.   Sat-12 ta’ Awwissu 2028 jew 30 xahar wara l-adozzjoni tal-atti ta' implimentazzjoni msemmija fil-paragrafu 2, skont liema tiġi l-aħħar, l-Istati Membri għandhom jiżguraw li t-tikketti armonizzati li jippermettu l-ġbir separat ta' kull frazzjoni materjali speċifika tal-iskart mill-imballaġġ li jkun maħsub li jintrema f'reċipjenti separati jitwaħħlu, jiġu stampati jew jitnaqqxu u jkunu jidhru, jistgħu jinqraw u ma jitħassrux fuq ir-reċipjenti kollha tal-iskart għall-ġbir tal-iskart mill-imballaġġ. Reċipjent għall-iskart mill-imballaġġ jista' jkollu aktar minn tikketta waħda. Dan l-obbligu ma japplikax għal reċipjenti soġġetti għal sistemi ta' rifużjoni tad-depożitu.

2.   Sat-12 ta’ Awwissu 2026, il-Kummissjoni għandha tadotta atti ta' implimentazzjoni biex tistabbilixxi tikketti u speċifikazzjonijiet armonizzati għar-rekwiżiti u għall-formati tat-tikkettar għat-tikkettar tar-reċipjenti msemmija fil-paragrafu 1 ta' dan l-Artikolu. Meta tiżviluppa dawk l-atti ta' implimentazzjoni, il-Kummissjoni għandha tqis l-ispeċifiċitajiet tas-sistemi tal-ġbir stabbiliti fl-Istati Membri kif ukoll l-ispeċifiċitajiet tal-imballaġġ kompost. It-tikkettar għar-reċipjenti għandu jikkorrispondi mat-tikkettar għall-imballaġġ kif imsemmi fl-Artikolu 12(6) bl-eċċezzjoni tat-tikkettar għall-imballaġġ soġġett għal sistemi ta' rifużjoni tad-depożitu. Dawk l-atti ta' implimentazzjoni għandhom jiġu adottati f'konformità mal-proċedura ta' eżami msemmija fl-Artikolu 65(2).