Artikolu 61 Kontrolli fuq l-imballaġġ li jidħol fis-suq tal-Unjoni

1.   L-awtoritajiet tas-sorveljanza tas-suq għandhom jikkomunikaw, mingħajr dewmien, lill-awtoritajiet iddeżinjati skont l-Artikolu 25(1) tar-Regolament (UE) 2019/1020 il-miżuri msemmija fl-Artikolu 58(5)ta' dan ir-Regolament meta n-nuqqas ta' konformità ma jkunx ristrett għat-territorju tagħhom. Dik il-komunikazzjoni għandha tinkludi l-informazzjoni rilevanti kollha, b'mod partikolari d-dettalji meħtieġa għall-identifikazzjoni tal-imballaġġ mhux konformi li għalih japplikaw il-miżuri u, fil-każ tal-prodott fl-imballaġġ, il-prodott innifsu.

2.   L-awtoritajiet iddeżinjati skont l-Artikolu 25(1) tar-Regolament (UE) 2019/1020 għandhom jużaw l-informazzjoni kkomunikata skont il-paragrafu 1 ta' dan l-Artikolu biex iwettqu l-analiżi tar-riskju tagħhom skont l-Artikolu 25(3) tar-Regolament (UE) 2019/1020.

3.   Il-komunikazzjoni tal-informazzjoni msemmija fil-paragrafu 1 għandha ssir billi tiddaħħal l-informazzjoni fl-ambjent rilevanti tal-ġestjoni tar-riskju doganali.

4.   Il-Kummissjoni għandha tiżviluppa interkonnessjoni biex tawtomatizza l-komunikazzjoni msemmija fil-paragrafu 1 ta' dan l-Artikolu mis-sistema tal-informazzjoni u l-komunikazzjoni msemmija fl-Artikolu 58(6) għall-ambjent imsemmi fil-paragrafu 3 ta' dan l-Artikolu. Dik l-interkonnessjoni għandha tibda topera mhux aktar tard minn 24 xhar mid-data tal-adozzjoni tal-att ta' implimentazzjoni msemmi fil-paragrafu 5 ta' dan l-Artikolu.

5.   Il-Kummissjoni għandha s-setgħa li tadotta atti ta' implimentazzjoni li jispeċifikaw ir-regoli proċedurali u d-dettalji tal-arranġamenti ta' implimentazzjoni għall-paragrafu 4, inkluż il-funzjonalitajiet, l-elementi tad-data u l-ipproċessar tad-data, kif ukoll ir-regoli dwar l-ipproċessar tad-data personali, il-kunfidenzjalità u l-kontroll għall-interkonnessjoni msemmija fil-paragrafu 4.

Dawk l-atti ta' implimentazzjoni għandhom jiġu adottati f'konformità mal-proċedura ta' eżami msemmija fl-Artikolu 65(2).