Artikolu 64 Eżerċizzju tad-delega

1.   Is-setgħa ta' adozzjoni ta' atti delegati hija mogħtija lill-Kummissjoni suġġett għall-kundizzjonijiet stabbiliti f'dan l-Artikolu.

2.   Is-setgħa ta' adozzjoni ta' atti delegati msemmija fl-Artikolu 5(7) u (8), fl-Artikolu 6(4), l-ewwel u t-tielet subparagrafi, fl-Artikolu 6(6), fl-Artikolu 7(9), fl-Artikolu 7(12), it-tieni subparagrafu, fl-Artikolu 7(13), fl-Artikolu 11(2), fl-Artikolu 29(10), fl-Artikolu 29(12), is-sitt subparagrafu, fl-Artikolu 29(13), it-tieni subparagrafu, u fl-Artikolu 29(18) għandha tingħata lill-Kummissjoni għal perjodu ta' 10 snin mill-11 ta’ Frar 2025. Il-Kummissjoni għandha tfassal rapport fir-rigward tad-delega ta’ setgħa mhux iktar tard minn 9 xhur qabel it-tmiem tal-perjodu ta' għaxar snin. Id-delega ta’ setgħa għandha tiġi estiża awtomatikament għal perjodi ta' żmien identiċi, ħlief jekk il-Parlament Ewropew jew il-Kunsill joġġezzjonaw għal tali estensjoni mhux iktar tard minn 3 xhur qabel it-tmiem ta' kull perjodu.

3.   Id-delega tas-setgħa msemmija fl-Artikolu 5(7) u (8), fl-Artikolu 6(4), l-ewwel u t-tielet subparagrafi, fl-Artikolu 6(6), fl-Artikolu 7(9), fl-Artikolu 7(12), it-tieni subparagrafu, fl-Artikolu 7(13), fl-Artikolu 11(2), fl-Artikolu 29(10), fl-Artikolu 29(12), is-sitt subparagrafu, fl-Artikolu 29(13), it-tieni subparagrafu, u fl-Artikolu 29(18) tista' tiġi revokata fi kwalunkwe mument mill-Parlament Ewropew jew mill-Kunsill. Deċiżjoni li tirrevoka għandha ttemm id-delega ta’ setgħa speċifikata f'dik id-deċiżjoni. Din għandha ssir effettiva fil-jum wara l-pubblikazzjoni tad-deċiżjoni f'Il-Ġurnal Uffiċjali tal-Unjoni Ewropea jew f'data aktar tard speċifikata fih. Ma għandhiex taffettwa l-validità tal-ebda att delegat li jkun diġà fis-seħħ.

4.   Qabel ma tadotta att delegat, il-Kummissjoni għandha tikkonsulta esperti nnominati minn kull Stat Membru skont il-prinċipji stipulati fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet.

5.   Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.

6.   Att delegat adottat skont l-Artikolu 5(7) jew (8), l-Artikolu 6(4), l-ewwel jew it-tielet subparagrafu, l-Artikolu 6(6), l-Artikolu 7(9), l-Artikolu 7(12), it-tieni subparagrafu, l-Artikolu 7(13), l-Artikolu 11(2), l-Artikolu 29(10), l-Artikolu 29(12), is-sitt subparagrafu, l-Artikolu 29(13), it-tieni subparagrafu, jew l-Artikolu 29(18) għandu jidħol fis-seħħ biss jekk ma tiġix espressa oġġezzjoni mill-Parlament Ewropew jew mill-Kunsill fi żmien xahrejn min-notifika ta' dak l-att lill-Parlament Ewropew u lill-Kunsill jew jekk, qabel ma jiskadi dak il-perjodu, il-Parlament Ewropew u l-Kunsill ikunu t-tnejn infurmaw lill-Kummissjoni li mhumiex sejrin joġġezzjonaw. Dak il-perjodu għandu jiġi estiż b'xahrejn fuq inizjattiva tal-Parlament Ewropew jew tal-Kunsill.