Artikolu 13 Informazzjoni, komunikazzjoni, pubbliċità u disseminazzjoni u sfruttament

1.   Dawk li jirċievu finanzjament permezz tal-Programm Euratom 2026-2027 għandhom jirrikonoxxu l-oriġini ta’ dawk il-fondi u jiżguraw il-viżibbiltà tal-finanzjament tal-Komunità, b’mod partikolari meta jippromwovu l-azzjonijiet u r-riżultati tagħhom, billi jipprovdu informazzjoni mmirata koerenti, effettiva u proporzjonata lid-diversi udjenzi, inkluż lill-media u lill-pubbliku.

2.   Il-Kummissjoni għandha timplimenta azzjonijiet ta’ informazzjoni u komunikazzjoni relatati mal-Programm Euratom 2026-2027, ma’ azzjonijiet fl-ambitu tal-Programm Euratom 2026-2027 u mar-riżultati miksuba. Barra minn hekk, għandha tipprovdi informazzjoni dettaljata u fil-ħin lill-Istati Membri u lill-benefiċjarji. L-entitajiet interessati għandhom jingħataw servizzi tat-tlaqqigħ ibbażati fuq l-evidenza u infurmati mill-analitika u l-affinitajiet tan-network, sabiex jiffurmaw konsorzji għal proġetti kollaborattivi, b’attenzjoni partikolari għall-identifikazzjoni ta’ opportunitajiet ta’ networking għall-entitajiet legali minn Stati Membri bi prestazzjoni baxxa fir-riċerka u fl-innovazzjoni. Abbażi ta’ din l-analiżi, jistgħu jiġu organizzati avvenimenti mmirati tat-tlaqqigħ fir-rigward ta’ sejħiet speċifiċi għal proposti.

3.   Il-Kummissjoni għandha tistabbilixxi wkoll strateġija tad-disseminazzjoni u tal-isfruttament biex iżżid id-disponibbiltà u d-diffużjoni tar-riżultati tar-riċerka u l-innovazzjoni tal-Programm Euratom 2026-2027 u l-għarfien sabiex jitħaffef l-isfruttar favur l-adozzjoni mis-suq, biex tavvanza l-kollaborazzjoni fir-riċerka u tagħti spinta lill-impatt tal-Programm Euratom 2026-2027.

4.   Ir-riżorsi finanzjarji allokati għall-Programm Euratom 2026-2027 għandhom jikkontribwixxu wkoll għall-komunikazzjoni korporattiva tal-prijoritajiet politiċi tal-Komunità kif ukoll għall-attivitajiet tal-informazzjoni, tal-komunikazzjoni, tal-pubbliċità, tad-disseminazzjoni u tal-isfruttament, dment li dawn ikunu relatati mal-objettivi msemmija fl-Artikolu 3.